Го запалиле „Бигорски“ за да изгорат доказите дека бил албански
Печати | Прати ја страницата | Врати се назад
Ова е скандалозна изјава на Неби Дервиши, претседател на друштвото на историчари-Албанци, кој тврди дека пожарот требало да прикрие оти манастирот е албански
Монасите од манастирот „Свети Јован Бигорски“ намерно го подметнале пожарот за да ги уништат сите важни документи и историски факти кои се доказ дека манастирот отсекогаш бил албански, пишува вчера весникот „Лајм“. Весникот, повикувајќи се на изјави од Бехиџудин Шехапи, директор на државниот национален центар за конзервирање, и на Неби Дервиши, претседателот на друштвото на албански историчари во Македонија, пишува дека во пожарот биле уништени „многу важни историски документи што покажуваат дека Јован Бигорски е еден од најстарите албански манастири“. Неби Дервиши, претседател на друштвото на историчари Албанци во Македонија, тврди дека највиновен за пожарот бил Паско Кузман, директорот на Управата за заштита на културното наследство. Според Дервиши, манастирот не е Јован Бигорски туку Јован Бигори.
- Кузман мора да сноси најголема одговорност за пожарот. Манастирот датира од 11 век, а до почетокот на овој век црковните миси се одржувале на албански јазик. Во пожарот изгореа многу важни албански документи за кои се сомневаме дека се намерно уништени за да се прикрие вистинската историја за манастирот, односно дека тој отсекогаш бил албански - вели Дервиши.
Дервиши нагласи дека не само што Јован Бигори бил албански манастир, туку дека албански биле и Свети Наум во Охрид, Калиште во Горно Нерези и уште многу други цркви во Македонија.
Директно прозваниот Паско Кузман вчера ни изјави:
- Ниту го познавам тој Дервиши, ниту сум чул за него. Со Беџихудин Шехапи, пак, заедно работиме на обновување на манастирот.
И Скендер Асани, потпретседател на друштвото на историчари Албанци, вчера не сакаше да ги коментира изјавите на Дервиши.
- Најдобро прашајте го Дервиши. Јас не можам ниту сакам да ги коментирам неговите изјави и ставови - изјави Асани.
Бехиџудин Шехапи, директор на државниот национален центар за конзервирање, вчера за „Нова Македонија“ демантираше оти во својата изјава за весникот „Лајм“ тврдел оти манастирот е албански.
- Не сум дал таква изјава. Јас само наведов дека монасите се најодговорни за предизвиканиот пожар и стојам зад тоа. Тие не се консултираа со Центарот за конзервирање и со Управата за заштита на културното наследство при изградбата на фурната и на електричната инсталација кои го предизвика пожарот.
Тие фурната си ја изградиле на своја рака, без да побараат дозвола од институциите под чија надлежност потпаѓа манастирот - вели Шехапи.
Во МПЦ информации објавени во „Лајм“ ги нарекоа „ноторна лудост“
- Прв пат слушам. Тоа е ноторна лудост. Не верувам дека некој изјавил ниту пак дека можел да изјави такво нешто. Немам друг коментар - изјави вчера дебарско - кичевскиот митрополит, владиката Тимотеј.
Историчарот академик Блаже Ристовски вчера со став дека „нема да коментира глупости“.
- На такви глупости достоинството не ми дозволува да одговорам - изјави вчера Ристовски.
Ацо Трајановски, научник од Институтот за национална историја и експерт за црковната историја, вели дека „информациите оти манастирот некогаш бил албански, се чиста глупост“.
- Тоа ниту е точно, ниту пак може да биде претставено како точно. Постојат историски докази и факти дека манастирот го изградиле и формирале Македонци од Охрид во 1020 година. Монасите се единствени низ историјата кои го штителе манастирот и невидена глупост е некој да каже дека тие го запалиле. Манастирот низ историјата бил пален неколкупати досега. Еднаш од Османлиите и повеќепати од албанските качачки банди - вели историчарот Трајановски.
А не, овој пат е од попалени пожарникари. Ех, малер држава, сите во дебарската единица за гасење пожар се погодиле пиромани. Пу јазк.
