Сум се газел од смеење
Насловна од утрешен Вечер
ВМРО-ДПМНЕ И СДСМ ГИ ПРОМОВИРАА КАНДИДАТИТЕ ЗА ШЕФ НА ДРЖАВАТА
Фрчко за претседател? Немој, не ме радуј!
Ова е Конвенција на ВМРО-ДПМНЕ и тие ме кандидираат. Јас сега влегувам во кампања во која ќе ги искажувам моите ставови, кои ќе бидат ставови на независните, на сите оние делови кои не можат да се промовираат преку партиите, рече Иванов по гласањето на делегатите
Двете најголеми партии, владеачката ВМРО-ДПМНЕ и опозициската СДСМ и дефинитивно ги промовираа кандидатите за претседателските избори. Професорите Ѓорѓе Иванов и Љубомир Фрчковски на 22 март ќе се борат за гласовите на граѓаните.
Илјада и шеснаесет делегати на ВМРО-ДПМНЕ на партиската Конвенција во Унивезалната сала во неделата го дадоа својот глас за професорот на Правниот факултет Ѓорѓе Иванов за кандидат за иден шеф на државата. Неговиот противкандидат, претседателот на Светскиот македонски конгрес Тодор Петров доби поддршка од 91 делегат. Ваквиот исход беше очекуван имајќи предвид дека зад кандидатурата на Иванов на конкурсот на ВМРО-ДПМНЕ застанаа дел од највисоките партиски функционери и бројни интелектуалци.
Иванов вети дека ќе биде оној кој ќе обединува и дека прашањето за името и идентитетот нема да се користат за партиски цели.
-Македонија има моќ бидејќи има длабоки корења, но некои сакаат да ни ги исечат или да ни кажат дека сме со плиток корен. Македонија навистина треба да се гордее со своето наследство, меѓутоа тоа мора да биде во функција на иднината. Иднината која не очекува не е ни малку лесна. Ова е Конвенција на ВМРО-ДПМНЕ и тие ме кандидираат. Јас сега влегувам во кампања во која ќе ги искажувам моите ставови, кои ќе бидат ставови на независните, на сите оние делови кои не можат да се промовираат преку партиите, рече Иванов.
Лидерот на ВМРО-ДПМНЕ и Премиер Никола Груевски рече дека треба да се продолжи со промените.
-СДСМ се бори да најде човек кој ќе се нафати да биде кандидат за претседател зад кој ќе стои мајсторот. Конечно Црвенковски дојде на тоа дереџе да го моли човекот за кого неодамна во еден разговор, мене гордо ми раскажуваше дека на клоци гордо го исфрлил од Владата, а за градоначалник на Скопје бараат кандидат од друга партија, за да се смета дека поразот не е нивен, рече Груевски.
Извршниот Одбор на социјал-демократите пак вчера одлучи дека Фрчковски треба да биде нивниот кандидат за шеф на државата. Синоќа се очекуваше овој предлог да помине и на партиската Конвенција. В.д. лидерот на СДСМ Зоран Заев ги повика особено партиите од опозицијата да го поддржат. Прва со поддршка излезе НСДП на Тито Петковски, иако пред само неколку дена лидерот на ЛДП Јован Манасиевски рече дека добил ветување од Петковски дека новите социјал-демократи ќе го поддржат нивниот кандидат Нано Ружин.
-Ќе поддржиме кандидат кој успешно ќе ја извршува функцијата претседател, успешно ќе ја претставува земјата во странство и ќе работи на внатрешната безбедност и меѓуетничките односи, вели Заев.
Фрчковски минатата недела во изјава за медиумите рече дека нема да влезе во претседателската трка.Во ВМРО-ДПМНЕ велат дека станува збор за партиски кандидат кој беше министер за внатрешни работи и за надворешни работи во Владата на СДСМ,односно Бранко Црвенковски.
Градимир МАРКОВСКИ
ЗА ЧЕТИРИ ДЕНА
Имер Селмани собра 10 000 потписи
Лидерот на Нова Демократија Имер Селмани ги собра потребните 10 000 потписи за кандидатура на претседателските избори.Тој вчера информира дека за четири дена успеал да собере 5000 потписи повеќе од потребното.Селмани е прв од претседателските кандидати кој на овој начин успеа да го исполни законскиот услов за да се појави на изборите во Март.Тој исто така засега е единствен кандидат оде партиите во Албанскиот политички блок.ДУИ и ДПА сеуште тактизираат.Интегративците најверојатно ќе го поддржат кандидатот на ВМРО-ДПМНЕ Ѓорѓе Иванов,а конечната одлука во ДПА ќе ја донесе лидерот на партијата Мендух Тачи.
ЛДП
Нема да го поддржиме Фрчковски
ЛДП вчера преку соопштение ги демантираше шпекулациите дека оваа партија ќе го поддржи Љубомир Фрчковски на претседателските избори. Од партијата велат дека продолжуваат со собирање потписи за нивниот кандидат за претседател Нано Ружин, кого го промовираа минатата недела.
-ЛДП им сугерира на бриферите од СДСМ што ги пласираат ваквите информации да не го губат залудно своето драгоцено време и да си најдат друг начин за да го промовираат нивниот партиски кандидат, а не преку злоупотреба на името на ЛДП, се вели во соопштението од партијата.
ОД ИНТЕРЕС, А НЕ ОД АЛТРУИЗАМ
Тито Петковски ќе се кандидира за градоначалоник на Скопје
Лидерот на НСДП Тито Петковски ќе се кандидира за градоначалник на Скопје на претстојните локални избори. Тој ќе настапи како кандидат на НСДП и СДСМ и ќе се обиде да му се спротивстави на кандидатот на ВМРО-ДПМНЕ Коце Трајановски.
Петковски вели дека предизвик за кандидатурата за градоначалник на Скопје е да го спаси главниот град од ерозија и враќање во далечното минато.
-Во политиката доминантно место има интересот, а не алтруизмот. Предизвикот го гледам во назадувањето на Скопје како метропола. Скопје заслужува културно и урбанистички да се издигне бидејќи во него сега се случува урбан хаос, рече Петковски.