КОШАРКА - ПРОБЛЕМИ ЗА НОВОФОРМИРАНАТА РЕГИОНАЛНА ЛИГА
Струмица нема да игра во БИБЛ
Откако не е обезбедена финансиска конструкција, раководството на екс-шампионот одлучи да се натпреварува само на домашната сцена
На крстопат: Тони Грнчаров
Кошарката во Струмица нема да згасне, но клубот ќе има многу помал буџет, кој нема да му дозволи да се бори за титулата во домашното првенство. Македонскиот вицешампион и првак за 2007 година,Струмица 2005,и официјално се откажа од натпреварување во новоформираната Балканска лига. Причина за тоа е што до вчера не се најде нов генерален спонзор. Откажувањето на струмичани од настапот во регионалната Балканска лига предизвика разочарување и проблеми и во Кошаркарската федерација на Македонија, која се бореше нашата земја да добие вајлд-карта за трет клуб. Клубот беше вклучен во ждрепката за БИБЛ и во првото коло требаше да се сретне со Фершпед Работнички. За разлика од „шпедитерите“ и Фени Индустри, кои ја уплатија гаранцијата од 10.000 евра за учество во БИБЛ, струмичани не го сторија тоа, иако за нив лично гарантирал директорот на репрезентациите во КФМ, Илија Мерџановски, кој е член на Бордот на БИБЛ. Ова е нов проблем за Балканската лига, по неизвесноста околу играњето на грчките екипи, кои најавија настап, но сега се пишманат. Струмичани на неодамна одржаното клупско собрание побараа партнер за спонзор во тимот за да го пополнат буџетот. Таков спонзор не се најде, па одлучија да не се натпреваруваат во БИБЛ, туку само на домашната сцена, со многу поскромен буџет и без амбиции за висок пласман.
- Веќе в сабота и официјално ќе соопштиме дека нема да учествуваме во БИБЛ-лигата, а во новата сезона ќе влеземе со амбиции за зачувување на прволигашкиот статус. Сметам дека доволно чекавме за да се најде нов спонзор, но времето не' гази и веќе во наредните денови ќе ги објавиме чекорите што ќе ги преземеме. Во секој случај, кошарката во Струмица не умира, туку и во наредната сезона љубителите на овој спорт ќе присуствуваат само на прволигашки натпревари - изјави Зоран Заев, потпретседател на клубот и градоначалник на Струмица.Според раководството на клубот, сите играчи се слободни и можат да заминат од Струмица. Тие малкумина што имаат договор со клубот ќе треба лично или нивниот нов клуб да го платат обесштетувањето за да можат да ги променат клупските бои. Во новата сезона се очекува „чушкарите“ да ангажираат еден до двајца поевтини странци и со играчи од Струмица да се обидат да го зачуваат прволигашкиот статус.
сепак фала на ПАНАЈОТИС КАРАПИПЕРИС за се што направи овие 2 години , и што ни донесе толку радост и убави моменти со овој Клуб кој ке ни останат во долги секавања ...
