РАКОМЕТ - ЛИГА НА ШАМПИОНКИТЕ
Европа му се поклони на Кометал Ѓорче Петров
Повеќе од 30 илјади луѓе на скопскиот плоштад Македонија ја поздравија европската титула на нашите шампионки, по победата против унгарскиот ХЕРЗ од 26-22
Повеќе од 30 илјади луѓе, и покрај дождот, излегоа на плоштадот Македонија во Скопје заеднички да ја прослават првата европска титула на една македонска екипа, откако ракометарките на Кометал Ѓорче Петров триумфираа во Лигата на шампионките. Тие во реваншот од финалето, во СРЦ "Кале", го победија унгарскиот првак ХЕРЗ Ференцварош, 26-22, дополнувајќи ја негативата од два гола од првиот меч, кој заврши со 27-25 за ХЕРЗ.
В година како европски прваци скопјанки директно ќе учествуваат во Лигата на шампионките, а за успехот ќе поделат и награда од 100.000 евра, кои има беа ветени во случај на успех.
Кометал ЃП е четврта екипа од просторите на бивша Југославија што ја освојува титулата по Крим од Словенија (2001), Подравка (1996) и Раднички Белград (1976, 1980 и 1984 година).
Плоштадот беше претесен да ги прими сите што сакаа одблиску да им честитаат на македонските ракометните хероини, кои и покрај едногодишната пауза од настапи во европските купови и бројните малери и повреди во текот на сезоната, се изборија за европската титула. До доцна во ноќта продолжи славењето на плоштадот и по улиците на Скопје. Автомобили со развеани македонски и клупски знамиња на ѓорчепетровки со сирени и песни ја прославуваа титулата. "Кометал, шампионе" ечеше неколку часа низ улиците на Скопје. Со запалени факели, светлечки ракети, знамиња, па дури и по некој истрел од огнено оружје, сите се радуваа за освоената титула.
Веднаш по завршувањето на мечот, сите ракометарки и навивачите што го следеа мечот на плоштадот заеднички ја прославија титулата. Европскиот пехар од бината на плоштадот се прошета и низ Градскиот трговски центар, бурно поздравен од луѓето што ги исполнија сите кафулиња каде што се гледаше ТВ-преносот од мечот. Во "заднината", за подобро да ги видат шампионките, имаше и такви што се качија високо на околните дрва.
- И покажавме на Европа дека не може да си игра со нас како сака. И покажавме дека имаме намера да бидеме шампиони и успеавме во тоа. Ова е само нов поттик тука да не застанеме. Ќе настојуваме трипати да го освоиме пехарот и да остане постојано тука - изјави Трифун Костовски, спонзорот на клубот, пред граѓаните на плоштадот.
Цел час траеше "фештата" во салата во СРЦ "Кале", исполнета со песни, "македонско девојче", прскање со шампањ, дружење со навивачите, прослава со одбојкарски "упијачи". Солзите-радосници потекоа на лицето на Костовски, спонзорот на скопјанки, кој уште пред девет години кога првпат се согласи финансиски да застане зад клубот, си постави цел да создаде европска екипа.
- Сите бевме под импресија дека во ова мора да успееме. Сите се трудевме да дотуркаме до едно ниво. Дури сега ќе се ослободиме и вистински ќе се одмориме и ќе славиме. Кога пред девет години си поставивме цел да бидеме прваци на Европа, тоа го сфатија како шега. Затоа и не сметаа за аутсајдери - изјави Костовски по мечот.
Салата во СРЦ "Кале" беше исполнета два часа пред почетокот на мечот, а некои што имаа билети мораа да се откажат од пред влезот откако салата се исполни и да им се придружат на тие на плоштадот, кои го следеа мечот на два видеобима.
Гостинките од Унгарија единствено што успеаја да сторат во текот на мечот е да го намалат водството на два гола разлика. Скопјанки постојано имаа водство, кое дури во последните 15 минути се зголеми на шест гола, 23-17 (во 53-тата мин.), по што беше јасно дека титулата доаѓа во Скопје. Позајмената голманка од Крим, Романката Луминица Дину, ги "откажа" Фаркаш, Шити, Мравиковам бранејќи се што можеше да се одбрани. Индира Кастратовиќ само двапати не го погоди голот, а во својот репертоар имаше и "шрауба" и "цепелин".
- Уште не сме свесни дека сме на врвот. Откако малку ќе се одмориме, ќе сфатиме каков успех сме постигнале. Оваа титула му ја посветуваме на газда Трифун и на целата македонска јавност, која не бодреше. Време беше да го освоиме пехарот. Се надевам дека ќе остане тука во Македонија малку подолго. Мечот беше како вистинско финале. Луминица блескаше на голот - рече Кастратовиќ.
На самиот почеток Дину трипати беше подобра од изведувачите на седмерец на ХЕРЗ, Фаркаш и Шити. - Дојдов тука за да играм за плата. И велев на целата екипа дека сигурно ќе биде првак. Ги гледавме противниците на видеоленти и добро ги анализиравме. Задоволна сум од тоа како бранев со Ларвик и сега со ХЕРЗ. Вториот меч беше навистина тежок, а осмиот играч на теренот ни беше публиката. Ви благодарам што така не бодревте - изјави Дину, која најави дека по завршувањето на договорот со Крим можеби ќе дојде во Скопје.
И тренерот Александар Панов, кој постојано се жалеше на недисциплина во играта и на многуте грешки, овојпат призна дека се било според договорот. Ѓорчепетровки имаа само 10 загубени топки и висок процент на реализација. - Победија девојките. Имаа поголемо срце, желба, борбеност. Одбраната ја одиграа како што треба. Задоволен сум што сите во клубот и луѓето во Македонија се среќни за оваа титула, заедно со нас, кои напорно работевме цела сезона. Од првиот ден поверував дека ќе бидеме прваци. Имавме прилика и ја искористивме. И болни, повредени - девојките издржаа до крај - изјави Панов.
ХЕРЗ само во 6 мин. успеа да израмни на 2-2, а потоа Кометал ЃП постојано беше во водство. Неколкупати во текот на мечот пропушти да направи разлика со која ќе му се одлепи на противникот. Прво на 12-8 беше нереализиран напад, а потоа и на 16-12. Но, и покрај тоа, до крај ја одржуваше разлика што им ја носеше титулата. По исклучувањата на Велкова и Ферзалиева во 57. минута, при резултат 25-19, за момент се почувствува загриженост да не се случи нешто непредвидено, бидејќи Бењат и Мравикова набрзина постигнаа два гола. Будимир ја запечати судбината на гостите, постигнувајќи гол во последната минута за победа од 26-22.
Кометал ЃП - ХЕРЗ Ференцварош 26-22 (12-10)
Сала во СРЦ "Кале". Гледачи околу 3.000. Судии: Кохут и Долејц и двајцата од Чешка. Делегат: Јозеф Амбруш од Словачка.
Кометал Ѓорче Петров: Дину (одбрани 16 удари и 3 седмерци), Нацева, Плошнинска, Калиниченко, Кастратовиќ 10 (1/2), Платон 1, Велкова 1, Бујанова 4 (2/4), Чупиќ, Будимир 2 (0/1), Ферзалиева 2, Андрушенко, Малахова 6, Златановска. Тренер: Александар Панов. Седмерци: 3/7. Исклучувања: 12 мин. (Калиниченко, Платон, Велкова, Бујанова, Ферзалиева, Малахова). Загубени топки: 10.
ХЕРЗ Ференцварош: Миклосова, Сугар (одбрани 7 удари и 4 седмерци), Петрович, Паштровик, Падар 3, Кирснер 3, Мравикова 3, Падар, Т.Тот, Ковач 1, Шити 2, Лови 2, Бењот 4, Фаркаш 4. Тренер: Андраш Немет. Седмерци: 2/5. Исклучувања: 8 мин. (Ковач х2, Шити, Фаркаш). Загубени топки: 11.
После дотуркаа ми се чини до четврт финале на купот на ЕХФ.
