АЛЕКСАНДАР ТОДОРОВ ОТКРИВА ЗОШТО Е ПОВТОРНО ВО МАКЕДОНИЈА, ПОТОЧНО ВО "ЈАНЕ САНДАНСКИ"
Сега сме тим, сакам да бидеме екипа, клуб...
" Можам да ветам само едно: или МЗТ Скопје ќе биде најдобро организираниот клуб во историјата на македонската кошарка или моја нога нема веќе никогаш да стапне во салата 'Јане Сандански'... Го имаме најдобриот 'тим' на луѓе кои стојат зад мене и зад играчите. Тие луѓе ми се гаранцијата дека ќе успееме повторно да го вратиме МЗТ на старите патеки".
Александар Тодоров повторно е во македонската кошарка. А тоа значи дека повторно се забрануваат кошаркарските води.
Својот темперамент, оној кошаркарскиот, знае да го искаже на разно-разни начини, што често е повод за различни коментари.
Некои велат дека е еден од "ретките" кои носат "раздвиженост" и даваат дополнителна енергија на нашата кошарка.
Не мируваше и во текот на летото кога се врати од Анкара каде беше во минатата сезона. (О)стана асистент во стручниот штаб на нашиот сениорски национален тим. Заедно со Марјан Лазовски му помагаше на новиот селектор Јовица Арсиќ. Во меѓувреме го "правеше" новиот МЗТ Скопје на себе својствен начин, редок за наши услови.
Иако требаше да зборува за вечното дерби со Фершпед Работнички, ќе почека една недела, а дотогаш за оние основни размислувања
Кои беа оние основни причини за "кам-бек" во Македонија, уште повеќе за враќањето во МЗТ Скопје?
" Имав многу дилеми дали да се вратам, не во МЗТ Скопје или во некој друг клуб, туку во Македонија генерално. Кога конечно одлучив, знаев дека МЗТ Скопје е единствениот клуб чија понуда би ја прифатил.
Од една страна, и тие беа доста упорни, но од друга страна чувствував дека од овој клуб заминав неславно, по онаа катастрофална сезона 2000/2001, кога на половина сезона со класична "местенка" бев тргнат.
Од друга страна, бев свесен дека МЗТ Скопје е клуб со огромна традиција, со феноменална публика, која знае понекогаш да биде незгодна и спрема своите, но без која МЗТ не би имал ни третина од успесите во минатото.
Воедно, бев свесен и дека МЗТ е без позабележителен успех во последните седум години и дека притисокот ќе биде уште поголем. Но токму тоа го направи предизвикот уште поголем.
И на крајот, постои и уште една причина за моето доаѓање во МЗТ, која во моментов не би сакал јавно да ја коментирам и која наскоро ќе биде обелоденета".
За амбициите?
" Како шеф на стручен штаб сакам да го поставам клубот на едно високо ниво, не само играчки туку и организациски. Веднаш по моето доаѓање замолив неколку мои пријатели, поранешни членови на МЗТ, но и личности со кои јас сум соработувал како тренер, да се приклучат во проектот на создавање на еден нов МЗТ Скопје. Со целосно изменет имиџ и преуреден на ниво на кој досега не бил ниту еден македонски клуб. Таа работа е макотрпна, со безбројни опструкции со кои се соочуваме секојдневно. Но решени сме да ја истераме до крај. Сакам секој еден што ќе влезе во нашата сала, со секое ново влегување да може да забележи разлика на подобро. Што се однесува до мене лично, можам да ветам само едно: или МЗТ Скопје ќе биде најдобро организираниот клуб во историјата на македонската кошарка или моја нога нема веќе никогаш да стапне во салата 'Јане Сандански'.
Реално ли е ова?
" Времето ќе покаже дали е реално или не. Ама во секој случај немам намера уште од сега да си правам алиби. Од мене нема да чуете ниту еднаш дека ми требало време да ја воиграм екипата (на пример до декември), дека играчите биле млади и неискусни, дека судиите или федерацијата не н$ сакале... Ќе одиме на победа на секој натпревар, посебно во нашата сала. Никој нека не помислува дека може да дојде во Аеродром и да н$ победи пред наша публика без отпор и без никаква борба. Понекогаш ќе играме и со подобри екипи, или ќе немаме свој ден. Но гарантирам дека моите играчи ќе го остават своето срце на теренот. Кој не е подготвен да изгине на терен за МЗТ, ќе биде набркан веднаш или во наредниот преоден рок. И ќе ги менувам играчите постојано, с$ додека не најдам 12 момци кои не само што ќе играат за МЗТ туку и што ќе го сакаат повеќе од кој било друг клуб за кој играле во минатото".
Се говори дека Ѓорѓе Војновиќ, Мирослав Котевски, Дејан Димов се во тој нов состав на МЗТ Скопје?
-На МЗТ Скопје му е потребен секој поранешен играч, спонзор, тренер, секој поединец кој го сака клубот, а кој е подготвен да му помогне на клубот...а под помош не се подразбира само финансиска.
Што се однесува до Котевски, Војновиќ и Димов, се договоривме со управата дека тие ќе свикаат прес-конференција во наредните денови на која ќе биде претставен новиот тим на МЗТ, и играчки и организациски.
Јас можам да кажам само едно што се однесува до ова прашање. Можеби во моментов го немаме најголемиот буџет во нашата лига, но дефинитивно го имаме најдобриот 'тим' на луѓе кои стојат зад мене и зад играчите. Тие луѓе ми се гаранцијата дека ќе успееме повторно да го вратиме МЗТ на старите патеки".
Се говори дека затоплувањето на салата "Јане Сандански" биле ден од твоите главни услови за да потпишеш договор со МЗТ Скопје?
"Квалитетен тренажен процес е предуслов за квалитетна игра и за победи. А не може да се говори за такви работи доколку температурата во салата е под 'нулата'.
Кај нас, обично, на управите им е побитно за купат еден 'бофал' странски играч за 5.000-6.000 евра годишно, место во салата да стават греење, кое на годишно ниво чини приближно исто.
На тој начин, не само што ќе им овозможат нормални услови за тренинг на своите играчи и на својот тренер туку, едноставно, ќе им покажат дека ги респектираат како личности.
А јас нема да дозволам да се одржи ниту еден тренинг на МЗТ, ниту, пак, ќе им дозволам на моите играчи да истрчаат на терен, на натпревар во сала во која нема греење. Дали подоцна ќе бидам казнет за тие постапки, или ќе биде казнета мојата екипа, апсолутно не ми е грижа. Еднаш мора да се стави крај на таквото изживување врз играчите и тренерите. Не сме експериментални глувчиња за да го оставаме и губиме своето здравје"- заклучува повратникот во нашата кошарка.
http://www.sport.com.mk/?ItemID=01CFB6DDA1897D4E93CB3EC372666321