Вечниот Рајан Гигс
Годините се само бројка за фудбалерот на Манчестер Јунајтед, Рајан Гигс. Со полни 38 години, Велшанецот официјално стави потпис на новиот едногодишен договор со својот клуб од детството. Ветеранот ќе му биде на располагање на Сер Алекс Фергусон и за следната 2012/2013 сезона. Новиот договор значи дека Гигс следната година ќе ја игра својата 22 сезона во дресот на „црвените ѓаволи“. Тој дебитираше за Јунајтед во март 1991 година, кога неговиот сегашен соиграч Фил Џоунс сè уште не бил роден, а Велбек, Клеверли и близнаците Рафаел и Фабио биле само бебиња.
„Рајан е фантастичен фудбалер“, изјави Фергусон за својот омилен играч. „Тој на некој начин е олицетворение на сите мои претходни тимови овде во Јунајтед. Постојано се пронаоѓа себеси, се адаптираше на промените на играта во текот на сите овие години и успеа да ја задржи желбата за трофеи. На секој тренинг и на секој натпревар, тој е пример за останатите. Младите фудбалери во соблекувалната имаат огромна шанса да учат од играч, кој ќе ги урне речиси сите рекорди во фудбалот и кои тешко дека некој ќе ги повтори“, заврши менаџерот на Манчестер Јунајтед.
Рајан Гигс сезонава одигра 22 натпревари, што го носи до вкупна бројка од 898 настапи за Манчестер Јунајтед. Реално, Велшанецот не може да одговори на задачите како пред пет-шест години, но во изјавата на Фергусон може да се прочита што, всушност, значи овој играч за клубот. Во првиот тим на Манчестер Јунајтед се наоѓаат и тинејџерите како Вил Кин, Езекиел Фрајерс, Ричи де Лает, кои растеле гледајќи ги мајсториите на Гигс во Премиерлигата. Затоа неговото присуство во соблекувалната е прирачник како треба да се однесува еден вистински фудбалер. Гигс сам по себе е мотивација за секој фудбалер, бидејќи 12-те титули во Премиерлигата, двете во Лигата на шампионите и останатите бројни трофеи го прават вистинска легенда на светскиот фудбал.
)) 
