КАКОВ МОЖЕ ДА БИДЕ РАСПЛЕТОТ ПО ГОЛЕМИОТ СКАНДАЛ ВО ИТАЛИЈАНСКИОТ ФУДБАЛ
Јувентус во втора или трета лига!?
Големиот скандал во италијанскиот фудбал покрена голем број прашања на Апенинскиот Полуостров. Најчесто поставуваното е каква казна треба да заработи Јувентус. Дали најтрофејниот италијански клуб ќе се извлече само со парична казна, или пак ќе биде суспендиран и ќе мора да се пресели во втората, па дури и третата лига.
Неодамна Џенова беше фатена за лажирање на само еден натпревар од Серија "Б" (против Венеција), за што оваа екипа експресно беше преселена во Ц1 лигата, при што & беа одземени и три бода.
Неофицијалните информации говорат дека против Јувентус ќе бидат покренати дури седум обвиненија, од кои најсериозното е под членот 13 од Законот за Спорт, при што ќе се бара исклучување на Јувентус од Серија "А", и или преселба во Серија "Б" и одземање бодови во следната сезона, или директна преселба во Серија "Ц1".
Губење на скудетата
Дали е возможно Јуве да ги загуби скудетата освоени во последните две сезони? Сигурно постои шанса за таков развој на настаните. Доколку биде утврдено дека Јувентус навистина лажирал натпревари од минатата, и од оваа сезона, преселбата во понизок ранг на натпреварување автоматски ќе значи и губење на освоените титули (бидејќи со тоа Јуве од првото, ќе добие автоматски пласман на последното место на табелата).
Уште не се знае дали ќе се започне истрага за лажирањата на Лучијано Моџи и од претходните сезони, што би можело да покрене уште поголеми контроверзии на "чизмата".
Можна ли е поблага казна?
Иако многумина очекуваат Јуве да мине со "поблага казна", се чини дека тоа не е возможно. Притисокот врз оние кои ќе ја донесат одлуката ќе биде огромен, со цел да се обели образот на италијанскиот фудбал по многуте скандали што излегоа на виделина во последните две недели.
Јувентус ќе се брани на единствениот можен начин - дека не треба да одговара за дејствувањето на своите директори, и дека Моџи и Џираудо сите лажирања ги средиле за да извлечат од тоа сопствена корист.
Членот 6 од законот за спорт остава простор Јувентус да добие и помала казна (само одземање на бодови на стартот на следната сезона), но тоа е само една од четирите можни казни (најстрога од нив е преселбата директно во трета лига).
Што ќе се случи со Фиорентина, Лацио и Милан?
Какви казни ќе заработат останатите екипи вмешани во овој скандал, поради лажирање на натпревари во текот на ланската сезона?
За Фиорентина и Лацио обвиненијата сигурно ќе бидат далеку полесни отколку за Јувентус. "Виолетовите" ќе се бранат дека пред две сезони биле уценувани од Моџи, и дека поради тоа биле принудени и самите да наместат натпревар за да си осигураат опстанок. Затоа, Фиорентина и Лацио ќе минат само со парична казна, и можеби одземање на бодови на стартот од новата сезона. Малку покомпликувана ќе биде ситуацијата со Милан, екипа која беше директно вклучена во борбата за скудетото. Случајот против "росоњерите" ќе го истражува Леонарди Меани, кој важи за најстрог обвинител во Италија и сигурно ќе ги собере сите можни докази против Адриано Галијани. Лошо за Милан е што за разлика од Јуве, "росоњерите" ќе одговараат директно како клуб, и ќе немаат којзнае каква шанса да се одбранат против собраните докази.
Јуве нема да игра и во Лигата на шампионите
Доколку Јувентус биде преселен во понизок ранг на натпреварување, тоа по автоматизам ќе значи и освојување на последното место на табелата. Со тоа, Јуве го губи и пласманот во Лигата на шампионите за следната сезона.
УЕФА сигурно ќе ги прифати сите одлуки на Италијанската Федерација, и со самото тоа "старата дама" не може да се надева на настап во елитното европско натпреварување. Доколку Јуве не може да настапува во Лигата на шампионите, неговото место ќе му припадне на тимот на Рома, кој заврши на петтото место на табелата.
Што ќе се случи со фудбалерите?
Дали во случај на преселба на Јувентус во втората лига, играчите ќе можат да си заминат. Во случајот на Јуве, фудбалерите во договорите немаат такви клаузули за заминување од Деле Алпи. Сепак, сигурно е дека челниците ќе мораат да продадат дел од своите најдобри фудбалери, за да ги намалат трошоците при играње во непрофитабилни лиги.
Проблем за Јувентус ќе претставува и неодамна воведениот "селари-кап" во втората и третата лига, со кои се огранучуваат буџетите на тимовите кои се натпреваруваат. Неофицијално, може да очекува Јувентус да задржи само три до четири од своите мега-ѕвезди, но останатите фудбалери ќе си заминат од Деле Алпи.