Крушевчани го чествуваа роденденот на Тоше
Ниту по шест години од трагчината смрт, крушевчани и голем број на фанови, не го заборавија роденденот на својот миленик, големата естрадна ѕвезда Тоше Проески.
Ниту по шест години од трагчината смрт, крушевчани и голем број на фанови, не го заборавија роденденот на својот миленик, големата естрадна ѕвезда Тоше Проески. Денеска на неговото вечно почивалиште на Гумење, се поклонија негови блиски пријатели, помлади и повозрасни сограѓани, но и прилепчани, битолчани и негови почитувачи од многу други градови. Одбележувањето на неговиот роденден, за нив е само уште еден потсетник за хуманоста на Тоше.
- Се трудиме, на било каков начин, да го продолжиме делото на Тоше - рече Борче Николоски од Крушево.
- на секого му излегуваше во пресрет, а тоа беше негов најдобар гест во животот. Така ќе остане меѓу нас - се потсети неговиот пријател Крсте Јованоски.
Во Спомен-куќата во која досега имало над двесте илјади посетители, покрај повеќе постановки, за првпат денеска беа изложени досега необјавени фотографии, а крушевчани за хуманоста му се оддолжија со крводарителска акција.
- Денеска ги имаме изложено необјавените фотографии на Тоше Проески, изработени на канвас – платно. Исто така, имаме дарување на крв, во негова чест за роденденот - рече Василија Андоновска, вработена во Спомен-куќата на Тоше.
Тоше Проески е роден на денешен ден пред триесет и три години, а од трагичната смрт во 2007 година, крушевчани како свој незаборав, го чествуваат неговиот роденден.
Сите се раѓаме, постоиме, и на крај исчезнуваме засекогаш од овој свет. Откако ќе заминеме остануваат спомените, и колку повеќе спомени има, толку и нас ќе не споменуваат повеќе, и ќе се сеќаваат на нас !!! Спомените што ги остави ти Тоше се преголеми за да бидеш некогаш заборавен, и затоа имај си Среќен Роденден каде и да си ... СЕГА ...
Во чест на роденденот на нашата прерано загината ѕвезда, да се потсетиме на неговите зборови и мисли:
1. Да имам огромна моќ, макар и накратко, би направил да исчезне омразата и злото и луѓето меѓусебно да делат љубов.
2. Цел свет е убав кога си насмеан. Кога си нерасположен, те нервира и сончев ден.
3. Човекот треба да биде инспириран, и го молам Бога да не ми ја зема инспирацијата за музиката и инспирацијата во животот.
4. Суштината на животот е да се сака, да имаш некој што те сака, да си сигурен дека те сака и дека е само со тебе.
5. Човекот мора да остане човек, без оглед на тоа со што се занимава и каков успех постигнал.
6. Љубовта не е нешто со кое треба да тргуваш. Испрати ја и не очекувај кусур. Не биди себичен.
7.Сакајте се! Вистинската љубов е онаа љубов која ја дариш, а не очекуваш да биде возвратена. Кога се чувствува чувството на љубов, доволно е еднонасочно. За врска треба да биде двонасочно, а за љубов е доволно само еднонасочно.
8. Секоја жена на овој свет заслужува, барем во очите на еден маж во еден момент, во една секунда, макар тоа било и само еднаш во животот, да се почувствува најпосакуваната жена на светот и ако цел живот ми помине во тоа, ќе знам дека не сум го потрошил залудно.
9. Не сакам да ми симнувате капа. Само сакам да се гордеете со мене.
10.Никогаш не би се откажал од пријателите. Секогаш би бил со нив. Во добро и во зло. Во добро да се радувам, во зло да помогнам.
11.За мене е незамисливо некој кој може да пружи нешто на оние кои имаат малку или воопшто, затвора очи и не пружа ништо.
12.Не сакам кога целта ги оправдува средствата, не сакам нечесни игри и не верувам дека во љубовта е се дозволено - исто како во војната.
13.Сите ние луѓе, сме поврзани со некоја посебна сребрена жичка во својата душа.
14.Децата се дар од Бога и не можам да не им се радувам. Кога и да се до мене знам дека ме чуваат.
15. За љубов би се борел до крај. За љубовта на личност што ми е драга, било да се работи за член на семејството, девојка или пријател. За љубов сум спремен на сè!
16.Кога ќе ви одземат сè, ќе ви останат двете раце, составете ги една до друга за молитва... Tогаш ќе бидете НАЈСИЛНИ!
