В понеделник Собранието ќе расправа за прифаќање на последниот предлог на Нимиц, со кој референцата ПЈРМ ќе биде заменета со „Република Македонија (Скопје)“.
Јавноста во изминатите неколку денови главно позитивно гледа на новиот предлог. Со него се задржува уставното име, а само во меѓународните организации на него се додава „Скопје“ како географска одредница. Со земјите што не признале како Република Македонија останува уставното име.
Во пресрет на гласањето, пак, зоврива политичката тензија. ВМРО-ДПМНЕ бара изјаснување за предлогот на Нимиц на референдум. Централниот комитет на партијата смета дека ниту една партија нема право да го прифати и да даде конечен одговор без да ги праша граѓаните.
Партијата, согледувајќи го распоредот на силите во Парламентот, тврди дека ќе направи се во нејзина моќ да не биде надгласана и за тоа ќе ги применела сите демократски средства.
Според СДСМ, ВМРО-ДПМНЕ создава разногласие во јавноста, а всушност од нив зависи дали ќе има седница или не.
„Ако ВМРО-ДПМНЕ не сака да има седница на Собранието, седница на Собрание нема да има, бидејќи претседателот на Собранието е од редовите на ВМРО-ДПМНЕ“, рече Радмила Шеќеринска, претседател на СДСМ.
„Јас се плашам дека некои луѓе ја згрешиле професијата. Кога си на власт, одговорот дека нема нешто да направиш не е доволен. Треба да кажеш што ќе направиш. Денеска ние велиме како опозиција дека нема да ја искористиме оваа шанса да ја нападнеме Владата на ВМРО-ДПМНЕ, иако таа тоа го заслужува“, додаде Шеќеринска.
Се уште не се знае какво ќе биде сценариото. Се очекува пратеничките дискусии да бидат ограничени, за да се има доволно време сите да го кажат своето мислење. Седницата би почнала околу 1 часот.
Експертите сметаат дека за првпат Парламентот ќе одлучува по вака важно, а невообичаено прашање. Оттаму дилемите како тоа треба да се изведе.
Според професорот по уставно право, Светомир Шкариќ, Парламентот треба да расправа самоиницијативно, на предлог на Владата или на предлог на Претседателот и да донесе одлука со мнозинство гласови. Со таа одлука нашите претставници да заминат во Букурешт.
На истата седница би било добро Собранието да изгради свое мислење дали прашањето за промена на името да се стави на референдумско изјаснување на граѓаните, вели професорот Шкариќ.
Други експерти и поранешни министри, членовите на Македонската академија, сите изминативе денови во медиумите го анализираа последниот предлог. Сметаат дека е добра шанса за замена на референцата ПЈРМ.
Професорот Љубомир Фрчкоски смета дека предлогот е максимум што можевме да го добиеме и Македонија треба да го прифати.
Аналитичарот Мерсел Биљали верува дека со прифаќање на ова име Македонија добива многу поволна позиција пред самитот на НАТО во Букурешт.
Според Димитар Мирчев, компромисот треба да се бара само во името, но не и во другите точки. За професорот Владо Поповски, предлогот е коректен и прифатлив.
И МАНУ излезе со став во кој пакетот на Нимиц го оцени како добра база за договор со Грција.
