Макфест треба да се одржи на 5, 6. и 7. ноември!
Како што веќе најавивме, од градската управа на Општина Штип пристигна соопштение, врзано за актуелново издание на Макфест. Соопштението, кое произлезе од прес-конференција одржана во Штип, ви го пренесуваме во целост...
Ова е наша втора официјална средба на тема Макфест. Со цел избегнување на понатамошните шпекулции околу датумот на одржување на Макфест, кои одат на штета на фестивалот и неговиот углед, имаме поконкретни информации кои се однесуваат на фестивалот на музика, заради што ги даваме овие изјави.
Изминатите десетина дена се изнаслушавме разни датуми. Ќе го има на 5, 6. и 7 ноември, па на 23. октомври, па на 19. декември а некои толку беа сигурни во изворите што дури пишуваа дека фестивалот ќе се одржи на денот на Свети Никола – 18. ноември, иако секој верник многу добро знае кога е Свети Никола. Но со оглед на реномето на фестивалот, потполно ја разбираме желбата јавноста да добие информација за се.
Ја потсетуваме јавноста дека по добивањето на официјалниот документ од страна на АД Фершепд за отстапување на основачките права, Гадоначалникот на Штип, д-р Зоран Алексов изјави дека одговорните интензивно и одговорно работат фестивалот да се одржи на 5, 6. и 7. ноември, кој е приоритет во поглед на одржувањето на Макфест. Но, ако правните и финансиските причини не спречат, тогаш како можен датум, значи внимавајте - можен датум би бил денот на Свети Никола 19. декември.
Сепак, по интензивни преговори, укажуваме дека и понатаму наша интенција е фестивалот да се одржи на 5, 6. и 7. ноември. Ова се приоритетни датуми и се надеваме нема да наидеме на сериозни проблеми кои би го попречиле неговото одржување тогаш.
Градоначалникот интензивно е во контакт со претставници на бизнис секторот во Штип кои сакаат финансиски да го подржат фестивалот и во таа насока имаме оптимистички тек на преговорите. Постојат многу субјекти кои сакаат да го помогнат фестивалот а секако и Општината ќе има свој удел.
Сигурно ќе прашате колку ќе чини фестивалот, но верувајте дека планираното и реалното секогаш се разликуваат а тоа најдобро ќе ви го потврди директорот на фестивалот, г-динот Стојан Троицки. Ние работиме на тоа да се обезбедат неопходните ставки кои ќе овозможат подмирување на основните трошоци кои нема да го доведат во прашање одржувањето на фестивалот. За десетина дена, сите носечки структри инволвирани во фестивалот ќе излезат со официјална прес-средба на која ќе ги кажат деталите.
Проблем за фестивалот беше правниот елемент, но тоа е на пат да се реши. И покрај вашиот интерес, ве замолуваме да завршат правните активности за да можеме слободно да кажеме дека се е завршено, без да изнесуваме претпоставки.
За да нема повеќе шпекулации, уште еднаш потрдуваме дека прв човек на фестивалот останува г-динот Стојан Троицки, кој и во изминатите 23 изданија не фестивалот ја вложи сета своја енергија, заеднички со својата екипа да го направат Макфест она што тој денес е. Тој ја има сета наша подршка, не само да го реализира Макфест по 24-ти пат, туку фестивалот да го направи да биде и квалитетен, и уште еднаш да покаже дека во организационен и музички аспект останува мегу водечките во Македонија.
Општина Штип сака да им изрази посебна благодарност на штипските медуми и дописници, како и на сите други новинари, кои ја испочитуваа нашата молба да се воздржат од претпоставки се до утврдување на одредени работи, избегнувајќи сензационализам со објавување на шпекулации, а се во полза на фестивалот. Ви благодарам на интересот, бидејќи и без вас Макфест не би бил она што е.
Му благодариме уште еднаш и на АД Фершепд кое покажа коректност во текот на преговорите и кој го предаде фестивалот на Општина Штип без никаков надомест и со измирени обврски, со заложба тој и понатаму да живее.
И, уште нешто. Се водат интензивни преговори генерален покровител на фестивалот да стане АД Баргала, на местото на Фершпед, а еден од спонзорите би бил Телекабел, кој би помогнал во поставувањето на прес-центарот. Исто така се преговара уште со две-три други фирми, за спонзорирање на фестивалот. Во ревијалната програма на финалната вечер најверојатно ќе настапи Влатко Стефановски.
Се очекува сите детали да бидат познати до 21. октомври, за кога е предвидена прес-конференција во Скопје, за што дополнително ќе ве известиме.
