„ПРОЏЕКТ ЖЛУСТ“ ПРОМОВИРА НОВ АЛБУМ
Инкубатор на нови музички идеи Скопскиот состав, заедно со „Љубојна“, вечерва ќе има концерт во Салонот на МОБ во рамките на „Оф-фест“и во живо ќе го претстави последното цеде
Од претходните албуми „Инкубатор“ се разликува во многу работи: оркестрација, целиот ансамбл е акустичен, различни бои, состојби и амбиенти: Џијан Емин (во средина)
Еден од најоригиналните македонски состави „Проџект жлуст“ вечерва во Салонот на Македонската опера и балет на третата вечер од „Оф-фест“ ќе го промовира новиот албум „Инкубатор“, кој ќе се појави под етикетата на Скопскиот џез-фестивал. Албумот е составен од дел од песните кои групата лани ги изведе со Филхармонијата, а излегоа и на120-то лајв-издание. Џијан Емин, кој со Иван Бејков е автор на композициите, открива дека нумерите во студиската изведба звучат посимпатично.
- Музиката за „Инкубатор“ е направена многу одамна, уште пред да се случи концертот со Филхармонијата. Кога добивме понуда за настап со голем оркестар сакавме да ги свириме песните што тогаш ни беа најсилни. Затоа истите песни ги има на двете изданија. Во нормални услови би требало да биде обратно, прво албум, па концерт со филхармонија. Кај нас излезе вака, но воопшто не ни пречи - вели Емин кој во „Проџект жлуст“ свири на француска хорна и на клавијатури.
ДОЛГ ПРОЦЕС НА РАБОТА
На вечерашниот концерт ќе настапат со членови од Филхармонијата, а на бината ќе има околу 20 музичари. Емин вели дека тоа ќе биде голем предизвик, но на располагање имаат различни „бои“ и можност да се „движат“ во повеќе амбиенти. Укажува дека оркестарот овој пат ќе биде дополнување и дека концептот се разликува од ланскиот кога настапија со 80 музичари. Меѓутоа, кога е во прашање „Проџект жлуст“ работата со голема екипа е природна. На материјалот, покрај Емин, свират и Газменд Бериша, Владимир Крстев, Оливие Самуилан, Владимир Поп Христов, Иван Бејков, Здравко Ангелов, Михаил Јосифов, Благоја Перуновски, Гоце Стефковски, Алек Секуловски, а гостуваат Ѓоко Грујовски, Тони Китановски, Александар Петров, Башар Калифе и Владо Кајевиќ.
- За поголем дел од музиката имавме аранжмани, односно звучна слика кон која треба да се стремиме. Кога се снима со силни индивидуалци енергијата е многу силна. Имавме среќа што сите сме на иста страна и сите работевме многу за да го направиме овој албум. Иако со големи паузи, мило ми е што енергијата се одржа од почетокот до крајот и што успеавме да го реализираме албумот - појаснува Емин.
МУЗИКА ЗА ФИЛМ ИЛИ ТЕАТАР
Создавањето на композициите, како и секогаш, било инспирирано од животот и случувањата. Иако не може да издвои нешто како носечки мотив за музиката, Емин, од сегашна гледна точка, вели оти во новиот албум забележува многу „хумор, цинизам, иронија“ и додава:
- Џејмсбондовци изгубени на Балканот, циркуси, цигански свадби и хаос. „Инкубатор“ се разликува од сите претходни албуми. Спореден со другите се разликува во многу работи: оркестрација, целиот ансамбл е акустичен, различни бои, состојби и амбиенти, кои ги нема во минатите изданија. На претходните албуми немаме толку импровизации, а на овој има многу слобода во изразот. Направивме албум како да сме сосема нов бенд со нови идеи. И насловот е уникатен - смета Џијан. Музиката на „Инкубатор“ звучи како создадена за претстава или филм, нешто што групата на неколку наврати го правеше. Емин открива дека постои голема разлика во создавањето наменска и авторска музика.
- Кога се бара наменска, идејата и инспирацијата тргнуваат од конкретна идеја или само замисла на режисерот. И тука има простор за работа и слобода за авторот, но неспоредливо е чувството кога се прави музика што доаѓа без притисок и без вештачка провокација. Емоциите и енергијата се посилни и се случува нешто посебно, вистинско вдахновение. Тоа се најубавите мигови, а се' потоа е занает и многу работа - завршува Емин.
Насловот е слика за снимањето
Албумот е снимен во студиото „Чикен меднес“ од Бојан Угриновски и Ален Хаџи-Стефанов. Процесот бил многу долг оти работеле со големи паузи. Идејата била песните да ги снимаат заедно без „наснимувања“.
- Таквиот начин уште повеќе го развлече снимањето бидејќи често не бевме во можност да се собереме. Од оваа гледна точка целиот процес ни изгледа како една долга инкубација на материјалот, а и на самите себе. Најчесно беше албумот да се вика „Инкубатор“.