Пораз на македонските ракометарки на првиот натпревар во Романија
Со убедлив пораз од Романија од 37—24 македонската женска репрезентација составена само од ракометарки од домашното првенство ги започна натпреварите на трофејот „Карпати“ во Романија. Добро прво и очајно второ вака во кратки црти може да се оцени играта на нашиот национален тим на премиерата со Романија.
Нашата подмладена селекција одигра одлично прво полувреме во кое беше наполно рамноправен ривал на комплетниот домаќин. На полувремето Романија замина со минимална предноста од 17-15, во вториот дел попушти концентрацијата на младите избранички на Стрезовски , падот на играта во одбрана и лошата реализација на нападот веднаш беше искористен од силните домаќинки, по што Романките на крајот остварија убедлива победа од 37-24.
Прв стрелец на дуелот со Романија е нашата Марија Шптерјова со 8 голови во одличниот колектив на Романија отскокнаа Ардеан и Зафир со по 6 погодоци.
Во Романија поради повреда недостасува тројката и Тања Андреева, Мирјета Бајрамосвка и Елена Георгиевска. Натпреварите на трофејот Карпати ги продолжуваме утре против селекцијата на Украина.
Турнирот во Романија е последната серија контролни средби за нашата женска селекција пред декемвриските квалификации каде во конкуренција на Швајцарија, Азербејџан и организаторот на квалификациониот турнир Грција ќе атакуваме на првото место кое води во летниот бараж за пат на светскиот шампионат.