31. Into the Darkest Corner - Elizabeth Haynes
Една од најдобрите книги за месец Јуни, 2012 според Амазон. И
Сакам Книги се прилично луди по книгава.
Оваа книга се состои од две паралелни приказни, двете за Кетрин Бејли, кои се случуваат на растојание од 4 години. Кетрин Бејли се заљубува во наизглед совршениот Ли, на кој не му треба долго да ја прикаже својата премногу мрачна страна. Откако Кетрин ќе доживее траума поради него и никој од нејзините пријатели не и верува, тој е пратен в затвор, а таа се преселува и започнува нов живот. Мизерен живот, исполнет со страв. А потоа Ли излегува од затвор.
Книгава нема некои изненадувања, јасно ви е како ќе заврши уште од почетокот. Јас повеќе би рекла дека е драма отколку трилер. Ако очекувате дека ќе читате за некоја неверојатна бркотница помеѓу Ли и Кетрин, ќе се разочарате. Книгава повеќе го опишува насилството и секојдневниот живот на Кетрин.
Мене ми беше сосема просечна книга, не знам како се нашла на претходноспоменатата Амазон топ листа, меѓутоа според критиките кои ги читам, прилично многу луѓе се воодушевени од неа.
32. I heart New York - Lindsey Kelk
Чик лит, и
еве ја статијата на Сакам книги.
Книгава е катастрофа, благо речено. Софи Кинсела за Линдзи Келк е Достоевски. На гудридс ги оценив книгите на Кинсела со двојка ми се чини, ама откако и ставив една ѕвезда на оваа книга, се си мислам дека треба да ја зголемам оценката на Шопингхоличарката.
Значи ај што се чудам како е можно некои книги да се објавени, при сета таа конкуренција на автори. Ама како книгава ја прошла селекцијата за да биде преведена на македонски јазик, е тоа ме интересира.
Анџела Кларк го фаќа дечкото како ја изневерува на денот на венчавката на нејзината најдобра другарка, и бега во Њујорк, каде што не познава никого. И таму, глеј чудо, си наоѓа нови најдобри другарки веднаш, совршена работа и дечковци. И цело време јаде, а изгледа манекенски. Абе ајде.
Има ли некоја девојка која е главен лик на овие чик-лит романчиња, а да не работи за списание или како блогерка? Зарем на сите модата им е главна преокупација?
33. Inferno - Dan Brown
За мене најочекуваната книга за оваа година, сосе новата на Калед Хосеини.
Во споредба со Кодот, оваа книга е многу, многу послаба. Фалат загатки. Еве јас на ниедна загатка не можам да се сетам. Книгава воопшто не е од оние кои се читаат во еден здив.
Значи, Кодот на Да Винчи, Ангели и демони и Дигитална тврдина ми се нај од Ден Браун. Потоа иде ова, па на крај Загубениот симбол, таа сеуште ми е најлоша.
34. Her Fearful Symmetry - Audrey Niffenegger
Со оглед на тоа што The timetraveler's wife ми е една од омилените книги, имав големи очекувања од оваа. И очекувањата воопшто не ми беа исполнети. 2/5 има книгава од мене, ептен ради крајот.
Во првите две третини од оваа кнга не се случува ништо. Крајот е возбудлив, има пресврти кои воопшто не ги очеував. Ликовите (освен еден или два) се тотално недопадливи и книгата обраќа многу внимание на ситници кои никого не занимаат. On the + side, спомнати се Arcade Fire.
Две близначки (кои се безделничарки ама во книгата тоа е опишано на тој начин како да не е ништо лошо тоа што се откажале од три факултети а за работа не сакаат да чујат) се наследниците на станот на нивната тетка, која е близначка со нивната мајка. Условот за да го добијат станот е да живеат во неаго минимум една година и нивните родители да не стапнат во него. И така близначките се селат во станот и се запознаваат со нивните соседи, од кои едниот има OCD и сопругата штотуку го напуштила, а другиот е сопругот на нивната тетка.
Како што кажав, има неколку пресврти на крај и само заради нив можам да и дадам бел бумбар на книгава.
35. They do it with mirrors - Agatha Christie
Со оваа книга започна мојот маратон со Агата Кристи.
Оваа книга ја читам по вторпат, со тоа што првиот ја предвидов (една од мислам трите книги на Агата на кои го имам предвидено убиецот), но тоа сепак не ми ја направи помалку интересна.
Џејн Марпл е гостинка во една куќа каде се случува убиство додека сите се преокупирани со расправијата меѓу двајца мажи која вклучува закани со пиштоли. Типична Агата.
36. The pale horse - Agatha Christie
И оваа книга ја читам по втор пат, со тоа што првиот не ми се допадна воопшто. Е сега се деси тоа што мислев дека сум го запамтила убиецот и бев сигурна дека е тој, и на крај излезе дека сум запамтила погрешно, па пријатно се изненадив.
Пред да умре, една жена вика свештеник за да се исповеда. Свештеникот на листе запишува список од имиња кои навидум не се поврзани меѓу себе и набрзо потоа е убиен. Ливчето, за среќа, е сеуште кај него. Во приказната доаѓа и The pale horse, во кој живеат три госпоѓи кои наводно имаат надприродни моќи, во кои спаѓаат и убиства.
Е ова не е типична Агата. Тука писателката експериментира со натприродното и ја нема типичната група од осомничени.
37. Five little pigs (Murder in retrospect) - Agatha Christie
Е оваа книга ја читам првпат. Прво ја гледав соодветната епизода од серијата Agatha Christie's Poirot, и премногу ме воодушеви. Ист случај е и со книгата, една од моите омилени. Убиецот е сосема непредвидлив.
Поаро има состанок со една млада девојка, во која таа му објаснува убиство од пред 16 години врз нејзиниот татко, за кое обвинета била нејзината мајка. Девојката е убедена дека мајка и е невина и така Поаро започнува да истражува, односно да ги испрашува петте луѓе кои во тоа време биле во куќата.
38. A murder is announced - Agatha Christie
Во дневниот весник се појавува статија во која се вели дека во одредено време, во точно дадена куќа, ќе се случи убиство. Сите кои читаат мислат дека станува збор за практична шега, игра. Меѓутоа убиството навистина се случува.
Ова е третата книга од Агата која ја имам предвидено (втората е Ситафордска мистерија), но не бидејќи убиецот е очигледен, баш напротив, туку поради тоа што се запрашав себеси кој е најмалку веројатно да биде убиецот.
Дефинитивна препорака.
39. Towards zero - Agatha Christie
И оваа е една од моите омилени книги од Агата Кристи.
Во хотел се наоѓа тениска ѕвезда, неговата поранешна жена и неговата сегашна жена. Ситуацијата е доста напната, а кулминира со неколку убиства.
40. The body in the library - Agatha Christie
Еве ја статијата на Сакам книги.
Типична Агата Кристи. Повторно Марпл е онаа која го решава случајот. На крај има интересен пресврт (не зборам за оној со кој се открива кој е убиецот). Сепак, книгава мене не ме воодушеви премногу, но дефинитивно уживав додека ја читав.
41. Crooked house - Agatha Christie
Во една куќа во која живее богато семејство, убиен е најстариот член, оној кој го стекнал целото богатство. Обвинета е неговата млада сопруга, меѓутоа изгледа дека не е таа убиецот. Сепак, се чини дека никој од останатите нема мотив, сите го сакале стариот.
Агата го има изјавено следново за оваа книга:
Writing Crooked House was pure pleasure and I feel justified in my belief that it is one of my best.
--------------------------------
Иначе, да не се чудите. Штотуку се вратив од одмор и затоа толку ми се зголеми бројот на прочитани книги за кратко време. На плажа 80% од времето читам, дневно по една книга минимум. Лани не беше таков случајот поради Game of thrones, преголеми беа книгите и за време на цел одмор прочитав само две ми се чини. Во секој случај, изгледа дека ќе го завршам предизвикот предвреме
.
