По снимките со подготовките за убиството на Панче Жежовски вршени директно под безбедносните камери на обвинетиот Велибор Манев, а на кој се гледаат тој, Љупчо Палевски, Влатко Кешишев и Боре Видевски, обвинителството продолжи да изведува докази-снимки од истите камери.
Возилото „Рено кангу” на 22.11.2023 година доаѓа во 6.33 часот, се групираат сите, се разденува, ликовите им се гледаат појасно.
Пред да одат да го убијат Панче, Манев си го зема во раце кучето го гушка, го погалува и го прибира внатре. Во увото има слушалка.
Се вртка тука и Палевски. Сите се во јакните со бели ленти на ракавите, што ги носеа ноќта.
Утрото на 22 ноември 2023 година во 7.11 часот, влегуваат во партиското „Рено кангу” на „Десна” на Љупчо Палевски. Бидејќи се соседи со Панче, Велибор Манев тргнува пешки, по тренерки. По него бавно вози „кангуто”, одат кон Панче да го убијат.
Веќе во 13.38 часот се гледа како доаѓа Велибор Манев, ја отвора капијата. Го вади „Мерцедесот”, го препаркира десно од куќата, први место за “кангуто” на Палевски. Тоа влегува во дворот.
Боре Видевски си заминува со „Шкодата”.
По два дена, во истата куќа на Манев во близина на Велес, почнува подготовката и за грабнувањето и убиството на 14-годишната Вања Ѓорчевска од Скопје. На 24 ноември, во 3.47 часот наутро Боре Видевски доаѓа со „Шкодата”. На камерата се гледа дека ги носи истата јакна и капа од денот на убиството на Панче.
Со Велибор Манев разменуваат црни ракавици, Боре Видевски ги навлекува на рацете. Тргнуваат кон дворот на претходно убиениот и закопан Панче Жежовски.
Околу 4.30 часот, сè уште темница, од дворот излегува „Реното”, го вози Манев. Седнува Видевски во него и заминуваат во правец на градот.
На 24 ноември во 10.08 часот во дворот влегува „кангуто”, како што рече обвинителката, „по неуспешниот обид за грабнување на Вања утрото на 24.11.2023 година”. Од совозачкото излегува Боре, од возачкото Манев, Боре си заминува со „Шкодата”.
Потоа Манев вади две лопати, ги држи во левата рака, ги носи кон куќата.
Вади вреќа од „кангуто“, налик на вреќа за спиење, темносина е, ја дипли и ја враќа назад во пикапот.
Ноќта во 22 часот на 26 ноември 2023 година, само 12 часа пред да биде грабната и убиена 14-годишната Вања Ѓорчевска од Скопје, возилото „Рено кангу” се упатува кон Скопје.
На последната снимка од неговите камери, во 13 часот Велибор Манев со автомобил „Мерцедес” пристигнува пред неговата куќа, ја отвора капијата и паркира во дворот. Го носи истиот сив џемпер со црна лента, кој беше на снимките на сејф сити, како совозач во „кангуто” што го управуваше Љупчо Палевски по убиството на Вања.
plusinfo.mk
www.vecer.press
