Човекот е нешто помалку од животно, навреда за животните е да кажеме дека не сме ништо повеќе од животните, ние сме нешто помалку од нив, од смирениот поглед на животните говори мудроста на природата (Шопенхауер) само да потсетам дека уште Антистен сметаше дека животното е над човекот оти има само нужни и неопходни потреби а целата човечка историја не е ништо повеќе од безконечно зголемување на потребите чиј апетит води кон уништување на целиот живот на планетава, животните не војуваат, тие не пушат не пијат алкохол (угледајте се на нив) Животот на животното треба да ни биде идеал во одредени сегменти...
ЗОРАН АНДОНОВСКИ
Зошто животинското царство е поважно од човечкото
Самохраната мајка на три деца Василка Ристова од Кочани има 28 години и е болна од рак. Од креветот, покриена со јорган, директно во ТВ-камерата кажува дека метастазите не се сопираат. Наместо да е во болница, за мајката се грижат нејзините три деца. Нема пари за лекови, за храна, за греење.
„Јас помалку јадам во училиште, на мама да и донесам“, детски потресно вели ќерка и Бојана. За Василка сега е најважно каде ќе се вдомат децата кога неа ќе ја нема. Таа тоа го кажува со невидена смиреност и моли само за животот на нејзините деца. „Според правилникот“, таа го загубила правото на постојана парична помош, бидејќи во декември нејзиното дете наполнило три години... бил создаден „вакуум“... Сме немале прецизна законска регулатива за ваквите случаи.
Во Прилеп Каролина и Мирослав Ѓедовиќ цела зима оган не запалиле. Електричниот шпорет им го вклучуваат на децата за да си ги стоплат рацете за да можат да ги држат лајците да сркаат грав. Дома седат со капи и со палта или сите петмина се туткаат в кревет покриени со ќебиња. Каролина позајмува дрва од соседите да згрее вода да ги искапе децата, оти, како што вели, Марина оди во прво одделение и треба да е искапена. Имаат помош од точно 3.500 денари месечно.
Животинското царство е многу поважно од човечкото.
1 Затоа што за орелот или јастребот што слетал или паднал во дворот на резиденцијата на претседателот сите се заинтересираа и заинтригираа, многу повеќе отколку за трагедиите на двете споменати семејства. Ете зошто сите се стрчаа на Водно, а никому не му падна на памет да појде кај Ѓедовиќи или кај Василка.
2 Затоа што никој, ниту министерот за здравство Владо Димов, ниту министерот за труд и социјала Стевчо Јакимовски, не се јави по телефон во ТВ-вестите да се понуди да помогне, да ги среди „вакуумот“ и непрецизниот правилник и да даде два кубика дрва.
3 Затоа што ги нема градоначалниците на Прилеп и на Кочани (гледаат ли телевизија, читаат ли весници). Има ли подобар начин за да ја кренат популарноста од тоа да ги посетат, да им помогнат и да се сликаат со нив.
4 Затоа што и ние сме ја загубиле секоја мерка за хуманост, па поголема дебата предизвикува тешката положба на животните во зоолошките градини отколку онаа на сиромашните или на семејствата што ги снашла несреќа. Поголеми „херои“ се лавот, ламата, орелот што бил јастреб, лебедот и сообраќајката со кученцата, отколку детето што вели „помалку јадам во училиште, на мама да и донесам“.
5 Затоа што сите знаеме во детали дали лавот во Битола умрел од студ или од секс и дали ги оставил скотни двете млади лавици и кое крило на орелот му било повредено и чии кученца прегазила Ребека, но нема да направиме продолжение на тажните приказни за трите деца на Василка или за трите деца на Каролина.
Ним ниту имињата не им ги научивме.
http://www.vreme.com.mk/DesktopDefault.aspx?tabindex=0&tabid=1&EditionID=657&ArticleID=41198
