DALI VLADATA NE PRIBLIZUVA ILI ODDALECUVA OD EU I NATO.
1. EU
Црн четврток за македонската политичка елита по критиките на еврокомесарот Оли Рен
Владата експресно одговори на критиките на еврокомесарот Оли Рен, задавајќи си амбициозен план лошата политичка клима што владее во земјава да ја надомести со брза и ефикасна „акција” за донесување на потребните закони зададени од таканаречената европска агенда.
Премиерот Никола Груевски, по кусата пауза што му ја даде на својот Кабинет во саботата за да одмори од посетата на комесарот за проширување на Европската унија, а, според некои, и да се освести од критиките што ги изрече Оли Рен, веќе завчера, во неделата, итно ги свика министрите на реферирање.
Владината седница, на која Груевски се распрашуваше за фазата во која се наоѓаат „европските” закони и бараше министрите да побрзаат со нивното подготвување, директно беше пренесувана во домовите на македонските граѓани преку националниот ТВ-сервис. На удар се најдоа министерката за евроинтеграции, Габриела Конеска-Трајковска, министерот за труд и социјална политика, Љупчо Мешков, министерката за внатрешни работи, Гордана Јанкуловска, министерката за економија, Вера Рафајловска, министерот за транспорт и врски, Миле Јанакиески. Тие трпеливо одговараа на прашањата од премиерот кој им упаѓаше во нивните дискусии, а во еден момент, одговарајќи на забелешката на министерката за евроинтеграции дека претходната влада доцнела со некои од законите, остро ги потсети дека сега тие се министри и тие се одговорни.
Груевски покажа и нервоза поради застојот на законите во парламентот, отворено констатирајќи дека многу закони „чекаат” на усвојување во законодавниот дом, со што индиректно го впери прстот на одговорност и кон опозицијата, од каде што во изминатите денови добива лоши сигнали за меѓусебната соработка.
Првите реакции се дека Груевски ги „построи” министрите пред камерите на државната телевизија во пропагандни цели за да и' покаже на јавноста дека ги сфатил критиките, но, од друга страна, и дека е реалност оти по посетата на еврокомесарот на македонскиот премиер навистина му гори под нозете. Критиките на Рен се однесуваа на реформите во земјава, кои ги оцени како „заглавени” и побара да се забрзаат, и како што рече за политичката напнатост, што не води кон напредок. Рен рече дека земјава не може да си дозволи чекор напред, па чекор назад, и оти му е должност да предупреди дека настаните во последната година во Македонија добиле „алармантен развој”.
Своите оцени и впечатоци тој истовремено им ги соопшти и на власта и на опозицијата, а, според тонот на неговите критики, слободно може да се каже дека македонската политичка елита доживеа црн четврток минатата седмица.
Дали Груевски навистина се нашол во тесно по пораките од Рен или Владата со неделното „влегување” во домовите на граѓаните само прави обид да го поправи впечатокот дека западна во ќор-сокак по успешниот старт во првите месеци од владеењето? Тоа, најверојатно, ќе остане дилема до првите подиректни коментари на оцените на еврокомесарот на кои јавноста се' уште чека.
Во политичката јавност критиките на Оли Рен беа дочекани со воздржаност, но не и со рамнодушност. Нашата држава повеќе од една и пол деценија е под меѓународно набљудување, а на сите досегашни влади практично им беше оставено малку простор да водат самостојна политика. Но, од друга страна, еврокомесарот Рен, сепак, не е случајна фигура и македонската приказна за зачленувањето во европското семејство ќе зависи токму од оцените на такви функционери.
Засега ниту опозицијата не покажува знаци на промена на курсот по критиките од Рен кои се однесуваа и на неа, туку напротив, завчера се огласи со 2.800 амандмани кон предложениот собраниски деловник и се закани со напуштање на парламентот како одговор на предлогот на пратеничката од владејачкото мнозинство Лилјана Поповска за ограничување на парламентарните дискусии на 10 минути. Вчера Поповска го повлече предлогот, а СДСМ ги повлече амандманите.
Сето тоа покажува дека политичките игри меѓу власта и опозицијата продолжуваат со несмалена жестокост, а ако состојбите продолжат по старо, шлаканиците од еврокомесарот ќе останат само лоша епизода што ќе биде искористена во следната рунда меѓусебни препукувања меѓу владејачката десница и опозициската левица.
2.NATO
БРИСЕЛ
Грција го пресели проблемот со името во НАТО
Грција првпат отворено го постави прашањето за неопходноста од промена на името на Поранешната југословенска република Македонија на завчерашната седница на НАТО-амбасадорите, на која присуствуваше и македонската делегација предводена од премиерот Никола Груевски, објави вчера грчкиот електронски весник „Имерисија”, пренесе МИА.
Весникот наведува дека на средбата посветена на напредокот на Македонија за нејзиното членство во Северноатлантската алијанса, грчкиот амбасадор Јоанис Зепас истакнал дека „апсолутно е неопходно да биде решен проблемот со името во согласност со привремената спогодба”, за да се зајакне регионалната стабилност и да се зачуваат добрососедските односи меѓу двете земји.
„Имерисија” наведува дека
претставниците на НАТО по вчерашната средба во Брисел оцениле дека Македонија нема да биде подготвена да се зачлени во Алијансата во 2008 година. Во весникот се истакнува дека само Велика Британија, Турција, Словенија и Романија ја нарекувале земјата со нејзиното уставно име - Република Македонија