Во Тетово
Граѓанско здружение се заканува со протести ако не се тргне таблата „Свети Илија“ на Попова Шапка и не се изгради џамија кај рекреативниот центар!
Граѓанско здружение од Тетово се заканува со протести доколку општината не ја тргне таблата на двоседот на терените на Попова Шапка на кое пишува „Свети Илија" и доколку не одреди парцела за изградба на џамија.
Како што пишува весникот на албански јазик Лајмпрес, станува збор за здружението за соживот наречено „Подај рака“, кое веќе поднело барање до општината итно да ја отстрани таблата со написот „Свети Илија“ и да испита кој го дозволил нејзиното поставување. Здружението ќе покренело и судска постапка за да се разјаснел случајот, оти според нив написот е спорен и недозволив. Исто така од општината било побарано да додели и една парцела за изградба на џамија во близина на викенд-населбата на овој рекреативен центар од причина што таа од ден на ден станувала сè понаселена и повеќе не претставувала само престојувалиште за време на викендите, туку постојано живеалиште за многу луѓе.
Ако не се исполнат овие барања, ќе се организираат протести пред општинската зграда во Тетово, најавија од ова здружение.
„Општината има рок од 30 дена да го расчисти проблемот поврзан со таблата на двоседот и со спорниот напис ‘Свети Илија’. И да додели парцела за изградба на џамија. Во спротивно ние и неколку други невладини здруженија ќе организираме масовни протести“, вели за Лајмпрес Неџат Беџети, претседател на здружението.
Од општината велат дека ги разгледуваат барањата на здружението, но дека засега немаат конкретен став за истите.
