Струмица испишува најуспешна транзициска приказна
Во изминативе две години се реализирани 292 проекта за кои се потрошени над 7,6 милиони евра
Мегатрговскиот центар „Глобал“ има корисна површина од над 40.000 квадратни метри во чиј состав се катна гаража за 350 возила и градски пазар
СУЗАНА ТАСЕВА
СТРУМИЦА - Некогаш струмичани со гордост ја пееја песната „Струмица е мало гратче, личи на Лондон, во него има триста чуда, па и Ловен дом”. Денеска оваа песна полека оди во заборав, а Струмица последните две години полека, но сигурно, добива лик на град со сите европски нишани. Многу намерници, кои не ја посетиле во изминативе неколку години, се зачудени од новиот изглед на Струмица. Нивните погледи најпрвин ги задржува петкатниот мегатрговски центар „Глобал“, во центарот на градот, кој е прва таква градба во Македонија со катна гаража за 350 возила, со корисна површина од над 40.000 квадратни метри и Градски пазар на 3.400 квадратни метри. Ова мегаздание, кое чини над 15 милиони евра и е изградено според принципот на јавно и приватно партнерство, треба да биде предадено во употреба на 11 декември годинава, на денот на заштитниците на Струмица. Новата слика на Струмица ја дополнуваат и двата скоро уредени булевари на улиците „Маршал Тито“ и „Ленинова“ со палми, водоскоци и фонтани.
„Градот ни е многу поубав од порано. Убава работа е тоа што се гради. Дај боже така да се гради и на други места. Полека се навикнуваме на новиот лик на градот“, велат повеќе граѓани на Струмица. Дел од нив потенцираат дека сега повеќе треба да се внимава за да не се случи некултурата да го уништи убавото, но и да не се заборави на обезбедувањето услови за подобрување на стандардот на граѓаните преку отворање нови работни места и нови инвестиции.
Токму затоа, покрај убавата слика за надворешниот изглед на градот, не помалку заостануваат и директните инвестиции за развој на стопанството и другата инфраструктура во градот и населените места. Во општината велат дека посветуваат големо внимание на рамномерниот развој на општината. Во двете години од владеењето на локалната власт на чело со градоначалникот Зоран Заев се реализирани вкупно 292 проекта во сите сфери на живеењето, за кои се потрошени над 7,6 милиони евра. Исчистени се стотина километри одводни канали, асфалтирани улици, тротоари, изградени системи за водоснабдување, детски град и спортски игралишта, реновирани се повеќе училишта и објекти од јавен интерес. Од 208-те милиони општински буџетски средства, 160 се за капитални инвестиции.
„Најавите дека градот во оваа и следната година ќе биде нов град и населените места ќе бидат нови според изгледот. Нашата цел до крајот на 2008 година е да немаме отворени прашања од патната инфрастуктура и тогаш можеме да кажеме дека сме достоинствено урбано уредена општина“, велат во локалната самоуправа.
Што ја прави приказната за Струмица успешна?
„Едноставноста во примената на веќе установените методи, подигнати на ниво на европски стандарди ги дава посакуваните резултати. Успехот на општината е во тимот од млади, креативни и исполнителни луѓе, кои сите до еден „се инфицирани” од љубовта кон Струмица и решеноста да остават зад себе значајна, препознатлива трага од своето работење. Најважно од се' е токму поддршката од граѓаните. Лесно е денес да се биде градоначалник на Струмица и да се бележат успеси, кога сите активности се спроведуваат во услови на заемна доверба меѓу локалната самоуправа и граѓаните. Затоа, успехот не е само мој, туку заеднички на сите“, вели градоначалникот Зоран Заев.
Местоположбата и добриот глас што ја бие Струмица се чини дека се магнет за привлекување странски инвестиции. Локалната власт прави се' преку намалување на комуналиите и нудење поволни услови да ги привлече странските инвеститори. Засега во игра се инвестиции тешки 150 милиони евра од грчки, холандски, француски, италијански и шпански инвеститори, кои треба во наредните 5 до 7 години да ги ефектуираат нивните инвестициони планови за изградба на четири фабрики, со отворање на 3.000 нови работни места. Инвестиција од близу 15 милиони евра во Струмичко најавува и австриската фирма “Заубер махер” за собирање, транспортот и складирањето на комуналниот отпад. Според најавите, ќе бидат изградени центри за рециклажа и за селекција на отпадот, а ќе се вработат нови 60 работници.
Во општината потенцираат дека развојот би бил уште поуспешен доколку Владата донесе одлука градежното неизградено земјиште да се додели на управување на општините, како што е случај во повеќе соседни држави.
Потврда за успешното работење на општината е и добиениот сертификат за систем за управување и извршување услуги од надлежност на локалната самоуправа ИСО 9001-2000. Струмица е прва таква општина во државата со ваков сертификат, а четврта на Балканот. Само две општини во Словенија и една во БиХ имаат таков сертификат.
http://utrinski.com.mk
[/FONT][/SIZE]
