Дали знаете дека германскиот гигант Шалке, редовен учесник во Лигата на шампионите, в петок гостува во Скопје. Дали знаете која е врската помеѓу двата клуба? Дали знаете зошто в петок е важен Драган Мутибариќ? На крајот на краиштата, дали знаете зошто Шалке доаѓа во Скопје на пријателски натпревар?
На сите овие прашања одговор нема ниту кај управата на Вардар или како што тие милуваат да кажат – Борд на директори. Маркетингот за овој натпревар е сведен на фејсбук-објави, и тоа само на најмногу засегнатите – навивачката група „Комити“, на која мечот ептен ѝ е важен дуелот поради дружбата и збратименоста со „УГЕ“, навивачите на Шалке. Така всушност и се воспоставила конекцијата за гостувањето на Шалке, затоа и Германците доаѓаат гратис во Скопје, иако за денешниот сличен меч со Малме во Шведска наплаќаат огромни пари. Но тоа како нивна заслуга го претставува раководниот двоец, бесрамно китејќи се со туѓи перја.
Една (!?) прес-конференција е најавена за овој спектакл (барем треба да биде тоа), и тоа на ден пред мечот. Чиниш, таборите на двата клуба ќе кажат формации, зошто им се битни трите бода, кој во каков состав ќе настапи... Наместо да се искористи ревијалноста на овој натпревар за да се привлечат обични љубители на фудбалот, неутралци, луѓе што ќе ја одберат арената наместо продолжениот викенд во Пефкохори, Вардар, тотално дестимулирачки, им ја уништува желбата на стадион да дојдат и на тие што имаат намера за тоа.
Веројатно, „огромното“ искуство како фудбалски работници ги навело управата да помисли дека ова е дуел како оној со БАТЕ Борисов (квалификации за ЛШ), па дека луѓето ќе се истепаат за влезници. Но две-три илјади влезници, колку што се досега продадени (билетите се во оптек од минатиот четврток), се само најава на конечниот пораз на раководството – (полу)празни трибини и невиден срам. Кој ли само ќе дојде пак во Скопје на пријателски меч со Вардар, кога од Шалке ќе дознае дека тука аматери го водат клубот. Дека нема ни В од Вардар за кој тие чуле и знаеле.
Настрана пропуштената шанса за добра заработка на Вардар. Од ваков спектакл секој нормален клуб ќе направи пари со продавање сувенири, шалови, капи, знаменца, ќе се распраша како да го продаде ТВ-преносот (ако воопшто го има) во Германија, барем на локална телевизија од Гелзенкирхен. Но што ќе ѝ е на управата заработка од стотина илјади евра (минимум), кога на први ќе си легнат парите од Град Скопје. И ќе си поделат плата, премии, бонуси...
Историската шанса Вардар да се доближи до европската средна класа на клубови е пропуштена. Црвено-црните (управата) го избраа патот. Сакаат да се први во село, амбиции за во градот воопшто и немаат.
Ова значи дека дојде време кметот да ги распушти...
Златко Крстевски
http://www.mkd.mk/sport/fudbal/upravata-na-vardar-od-klubot-napravi-selska-zadruga
