Првиот човек на Ракометната Федерација на Македонија, Михајло Михајловски, го оцени како неуспех, но сигурно не и како фијаско исходот од квалификацискиот турнир во Гетеборг. Иако како главна причина за трите порази ја наведе преголемата еуфорија што беше создадена самата репрезентација, Михајловски конкретно го посочи Кире Лазаров и Борко Ристовски како играчи од кои што се очекуваше повеќе, а кои што не беа на потребното ниво на овој предолимписки турнир.
„
Сите очекувавме играта да биде како на ЕП во Србија, но за жал тоа не се случи. Клучните играчи не беа на нивото од Ниш и од Белград, сите видовте дека Кире Лазаров го немаше вообичаениот придонес, Борко Ристовски не одбрани на своето вообичаено ниво, а и Веле Марковски, кој што важи за наш најдобар дефанзивец исто така не одигра во рамките на своите можности. Дел од причините за непласманот на ЕП сигурно лежат тука, но како клучна се покажа преголемата еуфорија што беше создадена. Импресивниот резултат од Србија ни даде за право да се надеваме дека ќе успееме да се пласираме во Лондон, но за жал тоа не се случи“ - изјави Михајловски.
Со ваквиот став на претседателот на РФМ се согласи и Наумче Мојсовски, кој што порача дека треба да се гледа напред кон следните предизвици на оваа репрезентација.
„
Кире Лазаров е наш најдобар ракометар, наш лидер во последните десетина години, но тој не беше на нивото на кое што сме навикнале да го гледаме. Кога со една таква игра на Лазаров ние сепак успеавме да се држиме во егал-мечеви до самиот финиш и против Унгарија и против Шведска, јасно е дека оваа репрезентација има квалитет. Нашите резултати во Гетеборг се неуспех, но не се никакво фијаско како што сакаат многумина да ги претстават. Се што треба да направиме е погледите да ги насочиме напред, кон следните предизвици, бидејќи сметам дека оваа репрезентација има сили и квалитет да биде дел од елитните натпреварувања во следните неколку години“ - истакна Мојсовски.
Звонко Шундовски останува на функцијата селектор на машката ракометна репрезентација на Македонија и покрај слабите резултати и трите порази на предолимпискиот турнир во Гетеборг. Првиот човек на РФМ, Михајло Михајловски, смета дека Шундовски заслужува да продолжи да ја води оваа селекција и во иднина, пред се во претстојните квалификации за СП 2013 во Шпанија, во кои што за неполни два месеци националниот тим го очекуваат два бараж дуели со Австрија.
„
Кога го ангажиравме Шундовски, постигнавме договор тој да ја води селекцијата во квалификациите за ЕП 2012 во Србија. По добрите резултати во тие квалификации, решивме да ја продолжиме соработката со нов двогодишен договор. Следеше извонредниот настап на европскиот шампионат, со кој што неочекувано се создаде можност да се оди на Олимписки Игри. Без оглед на големата желба на сите, таа можност не беше искористена, но не гледаме причина поради тоа да вршиме смена на кормилото. Ако се знае дека баражите со Австрија ни се за неполни два месеци, еден ваков потег би делувал крајно несериозно од наша страна. Следната недела ќе има состанок на Управниот Одбор, очекуваме да го видиме селекторскиот извештај и наша цел е да направиме мали корекции, но никако и коренити промени“ - изјави Михајловски на денешната прес-конференција.
На новинарското прашање дали чувствува обврска самиот да се повлече од селекторската функција поради трите порази во Гетеборг, Шундовски одговори:
„Кратко и јасно, не“. 
Екипа
