Индустријата во подобра кондиција отколку што се мислеше
Ревидираните податоци на државната статистика се показател дека македонската индустрија веќе подолго време е во позитива. Вака власта ги толкува последните бројки на статистика добиени на нов примерок за вршење на испитувањето, обновен после пет години.
Тие покажаа дека индустриското производство пораснало за 5% во јануари споредено со истиот месец лани, но и дека растело и повеќе отколку што се мислеше последните седум месеци од годината.
Подобрите резултати се должат на тоа што заводот во испитувањето вклучи повеќе компании кои изминативе пет години не биле статистички следени.
Меѓу нив се и двете фабрики од Бунарџик, Џонсон Контрол и Џонсон Мети, заради кои суровата нафта од врвот на најувезуван производ за првпат е заменета со платина и нејзини легури, а наместо производите од железо најизвезувани сега се катализаторите за автомобили кои го користат токму овие суровини.
- Вклучувањето на Џонсон Мети и Џонсон Контрол во реалното рефлектирање на структурата на производствените компании во Македонија е еден од показателите дека македонската индустрија не е всушност во негатива, туку во позитивна зона еден подолг период. Ова е тој процес на преструктуирање на економијата за кој сите зборуваат долги години како да се направи. Ова е показател како се случува тоа преструктуирање и тоа не само во производството туку и во извозот - рече Ставрески.
Статистиката забележа дека во јануари трговијата се зголемила за над 60% во однос на истиот месец лани. За Владата е позитивно што увозот се зголемува заради потребите на извозот, односно наместо за широка потрошувачка, се увезуваат производи за преработка и извоз.
