ВОДИЧ ЗА УВОЗ НА СТАРО ВОЗИЛО
Подгответе плус 500 евра за документи
Зголемувањето на старосната граница за увоз на половни возила и драстичното намалување на акцизите и царината не значи дека си што ќе се купи од странство веднаш може и да се вози во Македонија
Зголемувањето на старосната граница за увоз на половни возила и драстичното намалување на акцизите и царината не значи дека сe што ќе се купи од странство веднаш може и да се вози во Македонија. Секое увезено возило пред да добие регистарски таблички прво треба да помине низ неколку контроли, а лицето што го увезува за него да обезбеди куп документи од земјата од којашто го купил и од Македонија. Освен тоа, секој што планира да увезе половно возило мора да знае дека царината, акцизата и ДДВ-то од 18 отсто не се единствените давачки и дека на дополнителни документи и услуги треба да се платат уште околу 500 евра, до добивањето на македонски регистарски таблички.
"Вест", во консултации со Царинската управа на Македонија, нотари и шпедитори кои имаат долгогодишно искуство, во чекори ви ја открива целата постапка за увоз на половно возило од странство, низ што сe треба да се помине и кои се дополнителните трошоци.
Подготви: И.Смиљанска
1. Купете возило со оригинална сообраќајна книшка
Откако ќе го направите изборот на автомобил за кој треба да внимавате да има најмалку ЕУРО 1 и ЕУРО 2, на некој од странските автоплацови треба да потпишете купопродажен договор со лицето што го продава. Со овој договор треба да добиете и сметка за сумата што сте ја платиле, и оригиналната сообраќајна книшка за возилото. Со обезбедувањето на овие документи завршува вашата работа со автоплацот.
2. Уште во странство ставете ЦОЛ таблички
Пред да тргнете кон Македонија не заборавајте да извадите документ за технички карактеристики на возилото. За овој документ најдобро е да се консултирате со лицето од кое сте го набавиле возилото. На пример, за цела Германија овој документ се обезбедува само во Минхен, или може да се обезбеди преку овластени дилери и чини околу 80 евра. Откако ќе го обезбедите овој документ, потребно е да земете и привремени т.н. ЦОЛ регистарски таблички со кои ќе го возите возилото до дома. Овие таблички чинат околу стотина евра, а се добиваат по откажувањето на старите. Ако возилото планирате да го транспортирате натоварено на товарно возило, тогаш не ви се потребни ЦОЛ таблички, туку само да ги откажете старите.
3. На македонската граница пријавете дека имате возило за царинење
Откако ќе ги обезбедите ЦОЛ табличките и сите претходно наведени документи, подготвени сте да се враќате назад. За патот предвидете пари за гориво и за патарини. Кога ќе стигнете на македонската граница, прво што треба да направите е да пријавите дека имате возило за царинење. По пријавата задолжително треба да добиете транзитен документ т.н. Т1 документ со кој ќе го возите возилото до една од петте царински испостави. Вакви испостави има во Скопје, Куманово, Штип, Гевгелија и Битола, а во која ќе се направи царинењето зависи од жителството на лицето кое го донело возилото.
5. Со царината се плаќа и акциза и ДДВ и еколошка такса
За царинската испостава ви се потребни Т1 документот, оригиналната сообраќајна книшка, документот за техничките карактеристики на возилото, купопродажниот договор или фактура. Врз основа на овие документи прво се прави царинење. Царината во моментот изнесува 1 и 10 отсто. Само 1 отсто е ако за возилото е обезбеден документ за европско потекло, а 10 отсто без овој документ. Но, со измените на Законот, кои се во собраниска процедура, наскоро оваа давачка треба да се преполови и да биде 5 отсто.
Откако ќе се плати царина за возилото се издава царинска декларација. Потоа се прави проценка на вредноста на возилото врз основа на која се плаќа акцизата која по ново ќе се движи од 0 до 18 отсто. На вкупната вредност на возилото со претходните платени давачки се пресметува и ДДВ од 18 отсто што треба да се намири, исто така, во царинската испостава. На истото место увозникот на старото возило задолжително плаќа и такса за животната средина. Според Законот, оваа такса се пресметува врз основа на кубикажата на возилото и за патничките возила се движи од 2.500 до 5.000 денари, додека за транспортните изнесува 10.000 или 12.500 денари.
5. Хомологација
Според новите правилници, кои се веќе во сила, хомологацијата се прави откако ќе заврши царинењето на возилото. Со царинската декларација и со сите претходно собрани документи, се оди во овластена станица за технички преглед каде што детално се прегледува возилото. Оваа процедура чини околу 6.000 денари и ако возилото ги помине тестовите за него се издава сертификат за хомологација.
6. Задолжителен превод на сите документи
Пред да се оди на регистрација за добивање македонски таблички, задолжително мора да се направи превод кај овластен преведувач на сите оригинални документи и задолжително тие да се заверат од нотар, што подразбира и дополнителни трошоци за оваа услуга. Преводите најчесто чинат од 350 до 450 денари по страница, а заверката кај нотар 150 денари по документ. Се преведува сообраќајната возачка дозвола, купопродажниот договор и документот за техничките карактеристики на возилото.
7. Регистрација
Откако ќе заврши хомологацијата и преводот, може да се оди на регистрација на возилото која во зависност од кубикажата на возилото во Македонија се движи од 10.000 до 12.000 денари. Во оваа постапка за увезеното возило се издаваат и нови македонски регистарски таблички кои чинат 1.400 денари и нова сообраќајна книшка.
Дозволен увоз на возила со старост до 18 години
Следните шест месеци во Македонија може да се увезуваат возила со ЕУРО 1, а во следните шест години возила со ЕУРО 2 стандарди, откако минатата недела стапија во сила новите правилници. Тоа значи дека ќе може да се внесат возила кои се произведени и пред 18 години, но кои ги исполнуваат стандардите пропишани во правилниците. Променет е и начинот на увоз на старите возила, според кој прво ќе треба да се направи хомологација на возилото, а потоа да се царини. Во случај увозникот да не добие позитивна оцена за хомологација, парите платени за царинска постапка ќе му бидат вратени на увозникот.
Освен патнички возила, со Правилникот за единечно одобрување на возило се опфатени и возилата од категориите: М (за превоз на патници), Н (за превоз на стоки) и О (приколки).
Со усвојувањето на овие подзаконски акти се овозможува спроведување во практика на одлуката на Владата на Република Македонија за олеснување на условите и постапките за увоз на користени автомобили и легализација на автомобилите со странски регистарски таблички во земјата.
Вест
