Од Обединетата македонска дијаспора велат дека најавената посета на Бакојани не е за изненадување. Очекуваат таа да присуствува на свечениот банкет што секоја година на крајот од март го организира американскиот претседател во чест на грчкиот ден на независноста. На прослава се покануваат по околу 250 највлијателни Грци во Америка. Македонците велат дека до тогаш имаат време да се подготват за лобирање, но порачуваат да се внимава со провокациите од македонска страна. Како пример ја даваат антимакедонската резолуција која Грците се обидуваат да ја протнат во Конгресот од 94-тата година. Она што загрижува е што со текот на времето таа добива се поголем број на поддржувачи.
„ Повеќето конгресмени ја поддржаа таа резолуција поради тоа што се преименува аеродромот “Александар Македонски“. Мислам, аргументите беа на страна на Грците и ги искористија многу добро, така што треба малку и претпазливи да бидеме со такви потези. Нели имаше и пред Букурешт Премиерот постави цвеќе на гробот на Гоце Делчев и на тој гроб имало мапа на Голема Македонија. Тоа многу го искористија Грците во Америка и добија повеќе поддршка од сенаторите и конгресмените поради тоа„ , изјави Методија Колоски, претседател на Обединетата македонска дијаспора.
