Ватикан организира конференција за Дарвин
Ватикан изгледа полека но сигурно ја отфрла теоријата за креација!
Ватикан организира конференција за Дарвин
ВАТИКАН - Ватикан ја спонзорира петдневната конференција за одбележување на 150-годишнината од издавањето на „Потекло на видовите“ од Чарлс Дарвин. Предмет е компатибилноста на еволуцијата и создавањето на светот. Таа е една од двете одделни меѓународни академски конференции што ќе бидат годинава спонзорирани од Ватикан. Целта е да се преиспитаат делата на научните мислители чии револуционерни идеи го предизвикаа религиозното верување: Галилео и Чарлс Дарвин. Научниците, филозофите и теолозите од целиот свет ќе се соберат во престижниот Папски грегоријански универзитет во Рим за да дискутираат за компатибилноста на Дарвиновата теорија за еволуцијата и католичкото учење.
Христијанските цркви долго време беа непријателски расположени спрема Дарвин, бидејќи неговата теорија беше во конфликт со основното библиско сфаќање за создавањето на светот. Меѓутоа, Католичката црква никогаш не го осуди Дарвин, како што го осуди и замолкна Галилео.
Папата Јован Павле Втори изјави дека еволуцијата е „повеќе од хипотеза“. Сепак, во 2006 година, водечки католички кардинал Кристоф Шоенбон од Виена, поранешен ученик и пријател на папата Бенедикт Шеснаесетти, предизвика контроверзност со тоа што рече дека Дарвиновата теорија за природна селекција е неспојлива со христијанското верување.
Водечкиот американски биолог, професорот Франциско Ајала, планира на конференцијата да презентира дека е погрешна т.н. теорија за интелигентен дизајн, предложена од поборниците на библиското учење за создавање на светот. „Дизајнот на организмите не е онаков каков што би се очекувал од интелигентен креатор, туку е несовршен и полош“, рече тој. „Недостатоци, дисфункции, необичности, загуба и немилосрдност преовладуваат во живиот свет“. (Би-Би-Си)
