"ЧКЕМБАРИТЕ" ОСТАВИЈА ДА СЕ ОДИГРА МЕЧОТ ШТО НЕКОГАШ БЕШЕ ДЕРБИ
Металург сигурен во Битола
ПЕЛИСТЕР - МЕТАЛУРГ 26:28 (13:15)
Сала: "Младост" во Битлола, гледачи: 500. Судии: Глигор и Спаско Ќаеви. Делегат: Петров
Пелистер: Кутаноски (5 одб), Н.Георгоевски (7 одб), Петковски, Пејовиќ, Гулабовски 4, Јануловски 2, Г.Георгиевски 3, Крстевски, Јанев 4, Митревски 3, Илиевски, Велјановски 9, Димитровски 1
Седмерци: 1/2 Исклучувања: 6 мин,.
Металург: Стојиновиќ (13 одб), Ристовски, Живковиќ 2, Димовски 1, Лазаров 1, Миркуловски 4, Шчепановиќ, Ѓоргоноски 2, Стоилов 5, Маљцев 2, Чантурија, Макалоски 4, Георгиевски 1, Шмигиќ 6
Седмерци: 4/5 Исклучувања: 6 мин.
Иако конечниот резултат е тесен, победата на фаворитот Металург не беше загрозена на синоќешниот натпревар во Битола. Скопјаните ја имаа целосната контрола во првото полувреме и водство од 4-5 разлика кое го одржува се до крајот на полувремето, притоа штедејќи ги силите и за натпреварот кој во сабота ги очекува во Словенија.
Сепак, на одмор се замина со само минус два за пелистерците, но веднаш во второто полувреме Металург го врати назад водството од 5 гола разлика.
Пелистер само на момент успеја да се закани кога на десетина минути до крајот намали на минус три (22:25).
Но, само неколку минути подоцна Металург одново водеше (28:23) и до крајот беше рутина. Пелистер постигна три гола по ред и намали на 26:28, но немаше шанса да го изненади противникот.
За одбележување е зголемениот револт меѓу битолчаните заради агонијата во која се наоѓа нивниот најомилен спортски колектив. Стотина "Чкембари" се појавија на стартот на натпреварот. Најавата беше дека ќе ја прекинат средбата и нема да дозволат Пелистер ваков каков што е да се натпреварува. Сепак, оставија битолските навивачи да се одигра натпреварот, а 30 минути кои ги миннаа во салата ги искористија за да упатат низа "комплименти" за работата на управата на клубот, пред се на првиот човек, Спире Мавровски.
