ВИНОЖИТО“ И ОМО ИЛИНДЕН-ПИРИН ВО СОВЕТОТ НА ЕВРОПА
Македонските малцинства распалија
На Грција и на Бугарија им станува се потешко да ја прикриваат вистината за положбата на македонското малцинство во нивните земји. Само прашање на време е кога тие ќе мора навистина да се зафатат со решавање на овој проблем, а не како досега, да го прават тоа само декларативно и под притисок на меѓународните организации. Ова го тврдат претставници на здружението на Македонци во Грција „Виножито“ и ОМО Илинден-Пирин во Бугарија по средбите во Советот на Европа во Стразбур и на состанокот на ОБСЕ во Варшава. Пред европарламентарците претседателот на „Виножито“, Павле Васкопулус, побарал Грција да преземе одговорност за своите постапки, особено околу непочитувањето на конвенциите за заштита на човековите и малцинските права. - Грција за непочитувањето на правата на малцинствата плаќа казни во Судот во Стразбур, а од друга страна не го почитува спроведувањето на сите конвенции на што е обврзана како членка на Европска унија - вели Павле Васкопулус, претседател на „Виножито“. Според него, веќе станува практика грчките судови да работат во спрега со актуелната државна политика. Тој како пример ја навел одлуката на Судот во Стразбур за регистрација на Домот на културата на Македонците во Лерин, одлука која надлежниот суд во Грција и натаму ја игнорира. Во „Виножито“ се надеваат дека посетите на експертите задолжени за испитување на третманот на малцинствата, какви што беа онаа на Комисијата за расизам и нетолеранција при Советот на Европа и онаа на претставникот на ОН, ќе придонесат правата на Македонците во Грција да се подобрат. Претставниците на партијата на Македонците во Бугарија, ОМО Илинден- Пирин, пред парламентарното собрание на Советот на Европа се пожалија за нивниот најголем проблем за одбивањето на бугарските судови да ја регистрираат партијата и покрај одлуката на Судот, која е во нивна корист. Стојан Георѓиев, претседател на партијата, вели дека токму за време на престојот на делегацијата во Стразбур претседателот на Бугарија, Ѓорѓи Прванов, во јавноста излегол со изјава дека ОМО Илинден-Пирин работи против интересите на Бугарија. Според него, тоа воопшто не е случајно и претставува обид за оцрнување на организацијата. - ЕУ предолго го толерира однесувањето на Бугарија. Токму затоа во говорот напоменав дека таа воопшто не е демократска земја и покрај членството во Унијата. На тоа остро се спротивставија бугарските парламентарци тврдејќи дека ги почитуваат обврските на Судот. Сепак, тоа не е точно, туку Бугарија само ја плати казната за непочитување на судската одлука - изјави Георгиев.
