еве неколку реченици и сликички за љубителите на фудбалот
Фудбалски вести
Ирак сензационален победник на Азискиот куп
Фудбалската репрезентација на Ирак во своето прво финале на Азискиот куп отиде до крај и го освои трофејот. Единствениот гол во последниот натпревар против Саудиска Арабија, кој се играше во Џакарта, го заби најдобриот стрелец Јунис Махмуд во 71 минута.
Пред почетокот на Купот, Континенталниот сојуз на секоја репрезентација и донираше по 40.000 долари. Бидејќи Ирачаните не можеа да тренираат во својата окупирана и разорена земја тие пари не им беа доволни. Азиската федерација направи исклучок и им донираше уште дополнителни 50.000 долари. Така им е овозможен настап на турнирот кој ќе ги запише во светската фудбалска историја. Ирачаните остварија три победи, без пораз и гол разлика 7:2.
Цврстата одбрана и еден генијалец неодоливо потсетува на португалската бајка на Грција, Ото Рехагел и Каристеас. Нивниот егзекутор се вика Јунис Махмуд, кој со четири гола е најдобриот стрелец на турнирот. Уште поголем е успехот на Ирак, ако се знае дека ова беше најсилниот Азиски куп досега. На него настапи и Австралија, а од тронот по две години е симната Јапонија.
И претседателот на ФИФА, Сеп Блатер го пофали Ирак за исклучителната претстава на Азискиот куп.
„Ова е голем ден за Ирак. Фудбалот го крена достоинството на нацијата која толку страда од војните. Тоа што го направија овие фудбалери е за голема почит. Во репрезентацијата имаше и шиити и сунити и курди. Вистинско обединување“, посочи Блатер.
Во Србија за нереди десет години затвор
Исфрлувањето на Партизан од Купот на УЕФА ја крена на нозе навивачка, фудбалска, но и политичка Србија. Иако, кај нашиот северен сосед до сега вредеше Законот за спречување на насилството на спортските натпреварувања, истиот под итно ќе биде изменет и значително заострен.
„Имавме итен состанок на кој присуствуваа министерката за спорт, министерот за правда и претставници на министерството за внатрешни работи“, изјави генералниот секретар на министерството за спорт, Сениќ. „Министерствата дадоа позитивно мислење за нацрт измените и дополнувањето на Законот за спречување на насилството, кој ќе биде ставен на дневен ред на Собранието. Измените предвидуваат ригорозни казни. На пример, за предизвикување верска и национална нетрпеливост предвидена е казна од една до пет години затвор. Казна до 10 години ќе добијат водачите на таквите групи“, откри Сениќ.
Едуардо се враќа дома?
Во Арсенал знаеја дека добивањето на работната дозвола за Едуардо може да биде проблем, па се осигураа. „Трансферот зависи од тоа. Ако не добие дозвола, нема да го задржиме!“, изјави Арсен Венгер.
Иако, се чинеше дека добивањето работна дозвола е само формалност, најновите изјави на тренерот на Арсенал отворија место за сомнеж. Едуардо не ги задоволува критериумите за 75 отсто настапи за репрезентацијата во последните две години, а смислата на тој потпис е да се осигура квалитетот во Премиерлигата. Во колевката на фудбалот може да играат само најдобрите, порачуваат од Островото.
Арсен Венгер , наводно, бил задоволен од Едуардо, но како што кажа не бил моќен да издејствува дозвола. „Во договорот предвидовме ваква ситуација. Ако Едуардо навистина не добие дозвола, нема причина да го задржиме. Комисијата ќе заседава и на 2 август кога се' ќе се знае“, за прв пат Венгер отворено најави можност да се случи разделба пред официјализирање на бракот. Во тој случај Арсенал би немал никакви обврски кон Едуардо и тој најверојатно ќе се врати во Динамо.
Њукасл дава 8,8 млн. евра за Алан Смит
Англискиот Премиерлигаш Њукасл е подготвен да плати 8,8 милиони евра за напаѓачот на Манчестер Ј., Алан Смит. Тренерот на црно-белите Сем Алардајс најпрвин не беше заинтересиран за Смит, но повредите на Џое Бартон и на Мајкл Овен го натераа да се обиде да го ангажира Смит, за кого се заинтересирани и Астон Вила, Мидлсборо и Евертон. Пред да дојде во Манчестер Ј. во 2004 година Смит играше за Лидс. За репрезентацијата на Англија има одиграно 18 меча и постигна два гола.
Јунакот на Копа Америка во Шахтјор за 15 милиони евра
Нери Кастилјо, репрезентативецот на Мексико, еден од најдобрите играчи на Копа Америка и стрелец на четири гола на тој турнир, од Олимпијакос премина во Шахтјор. Газдата на овој клуб, Ринат Ахметов, се сложил да му плаќа на Кастилјо, кој потпиша петгодишен договор, 2,3 милиони евра по сезона (целиот трансфер изнесува 15 милиони евра). По шест години минати во Атина и освоени шест титули и два купа, Кастиљо ја одби новата понуда на Олимпијакос, кој му нудеше двојно поголема плата. Селекторот на Грција, Ото Рехагел им сугерираше на челниците на Сојузот да му понудат грчко државјанство како би можел да игра за нивната репрезентација. Голот на Кастиљо против Бразил на Копа Америка многумина ги потсети на легендарниот гол на Пеле во финалето на СП 1958 година: Го лобуваше дефанзивецот на Бразил Мајкон и пред топката да падне на земја ја заби во мрежата на немоќниот Дони.
Со пресврт против Интер, Арсенал до трофејот
Арсенал со победата над Интер од 2:1 и пресвртот во последните 25 минути го освои пријателскиот турнир Емирејтс.
Италијанските прваци во предност ги доведе Давид Суазо, засилувањето од Калјари, во 62 минута по нафрлувањето на Цезар, но „топчиите“ успеаја со головите на Хлеб во 67 и на Ван Перси во 85 минута да дојдат до победата. Откако со доста среќа во првиот меч го победи ПСЖ, Арсен Венгер против Интер играше со речиси најсилниот состав, кој му беше на располагање (Волкот, Едуардо, Росицки и Адебајор не можеа да настапат), а единствено малку познато име беше Киеран Гибс. Во вториот меч ПСЖ со 3:0 ја совлада Валенсија. „Ван Перси е фантастичен и мислам дека може да ја преземе одговорноста да го замени Анри. Уверен сум дека може да постигне минимум 20 гола сезонава. Негова специјалност се посебно убавите голови, а тоа го докажа и со овој победнички“, изјави менаџерот на Арсенал, Арсен Венгер.
Инаку, на Емирејтс купот покрај стандардните три бода за победа и бод за реми се добива и по еден бод за секој постигнат гол, па така Арсенал заврши како прв со 10 бода, втор е ПСЖ со седум, Валенсија собра пет бода, а Интер само еден.
Пеле: Бекам повеќе играј, помалку позирај
Бразилската легенда Пеле му порача на новиот член на американската лига, Дејвид Бекам повеќе да се бави со фудбал отколку со позерство. „Бекам е повеќе поп-ѕвезда, отколку играч. Од моето искуство во Космос знам дека натпреварите во американската лига бараат играчот да е максимално подготвен“, изјави некогаш најдобриот фудбалер во светот, а денес и самиот ѕвезда на рекламните кампањи на Мастеркард и Пепси, како и голем промотор на Вијагра. „Лигата во САД е израмнета, а од него се очекува многу. Кога нема тренинг, тогаш може да шета по Холивуд“, додаде Пеле.
Рајкард: Барса е силна само на хартија
Откако челниците на Барселона потрошија 70 милиони евра за нови засилувања и на „Ноу Камп“ го донесоа Тиери Анри, бројни стручњаци ги прогласија Каталонците за главни фаворити во Лигата на шампионите и Примера. Меѓутоа, тренерот Франк Рајкард предупредува. „Барселона има страшен тим, меѓутоа засега сме јаки само на хартија. Далеку сме од посакуваната форма“, изјави Рајкард.
Барселона наредната сезона ќе ја предводат четири волшебници - Роналдињо, Меси, Ето и Анри. „Имињата во фудбалот не значат успех. Успехот го носи напорната работа и одрекувањата“, додаде холандскиот стручњак.
Покрај Анри на „Ноу Камп“ сезонава пристигнаа Јаја Туре, Ерик Абидал и Габриел Милито.
Бирмингем подготвува сензационална понуда за Раул
Новиот член на англиската Премиерлига, Бирмингем најавува трансферна бомба на пазарот ова лето. Станува збор за капитенот на Реал Мадрид, Раул. Менаџерот на Бирмингем Стив Брус разговарал со со добриот пријател на 30 годишниот Раул, Стив Мекманаман, кој е дел од новиот конзорциум кој го купи контролниот пакет акции во клубот. Мекманаман сака да ги засили позициите со купување ѕвезда, а Раул е добра шанса за тоа.
Подготовки Њукасл го надигра Јувентус
Англискиот Њукасл во пријателски меч го совлада Јувентус со 2:0. Стрелци на головите беа Обафеми Мартинс и Алберт Луке. И двата тима ги пробаа сите засилувања, а за Њукасл настапи и Киерон Даер, кого го врзуваа за трансфер во Манчестер Сити. Тој дури постигна и гол, но му беше поништен поради офсајд.
