Без разлика кој ќе ја формира нова македонска Влада таа ќе мора да го реши спорот со Грција за името. Колку повеќе се одолговлекува ова прашање толку е поголема веројатноста тоа негативно да се рефлектира врз земјата и нејзините европски аспирации, проценува за Дојче веле европратеникот Кристијан Вигенин.
Времениот известувач за Македонија се надевам дека власта и опозицијата ќе смогнат сили претстојните избори да поминат во демократска и фер атмосфера а потоа очекува деблокирање на преговорите за името.
„По петти јуни нема да има никакви оправдувања од страна на македонските власти, како во однос на напредокот за преговорите за името со Грција, така и во исполнувањето на другите критериуми. Без разлика која ќе биде владата, таа ќе има јасен мандат да работи на тоа, бидејќи понатамошното блокирање и одлагање на преговорите има негативни последици за земјата и народот и нивниот социјален и економски развој, како и за меѓуетничкиот соживот“, изјави Кристијан Вигенин.
Бугарскиот европратеник вели дека ќе врши притисок врз неговите грчките колеги, Атина да биде поактивна да покаже во однос на прашањето за името, но според Вигенин по изборите се ќе зависи од новото македонско раководство.
Времениот наследник на Талер, кој се повлече поради корупциски скандал апелира проблемот со името да не се користи за внатрешни политички цели.
„Таа тема не треба да биде користена за внатрешно политички цели, се надевам дека во еден момент и владата и опозицијата ќе се договорат дека тоа треба да биде извадено од внатрешно политичката дебата и да биде ставено како национална кауза или прашање, зад кое ќе застанат водечките политичките лидери и партии, со што ќе биде ослободен развојот на Македонија“, вели Вигенин.
Бугарскиот социјалист за Дојче веле е категоричен - не сакам да бидам известувач за Македонија до крајот на мандатот на ЕП. Образложение на Вигенин е дека не е во ред известувач на земја кандидат да доаѓа од соседна држава.
)
