Љубе Бошкоски прв официјален кандидат за претседател
Љубе Бошкоски како прв официјално потврден кандидат влегува во претседателската трка. ДИК доцна вечерва на трето состанување одлуката ја донесе едногласно. Кандидатурата претходно беше вратена на исправка.
На членовите на ДИК, освен на двајцата предложени од СДСМ, им пречеа иницијалите Љ.Б, како име на подносител.
Штабот на Бошкоски експресно реагираше и наместо Љ.Б сега стојат иницијалите К.С, што според ДИК ја задоволи процедурата и со ова соломонско решение излегоа од лавиринтот и кавгите на попладневната седница.
„Таа треба да се потврди, но претходно да се укаже на рокот од 48 часа, не ги превртувајте дискусиите. Господине Новаковски, ниту Вие можете од тие 12 илјади потпишани да видите, ниту јас. Ќе си види подносителот на листата“, изјави Јован Јосифовски, член на ДИК.
Бескрупулозно, ова беше првата реакција на изненадениот Љубе Бошкоски по одлуката да му се врати кандидатурата на доработка. За А1 вели, изненаден е од неговата матична партија, која вели ја создавал и им ја оставил. Што е натаму, прашува, дали ликвидација.
Вечерва со нешто посмирен тон, задоволен од одлуката на ДИК, но не пропушти да каже дека се било непотребно и несфатливо. За ова, вели за А1, разговарал и со амбасадорите на Грција и Германија.
ВМРО-ДПМНЕ по изјавата на Бошкоски за А1 со писмена реакција, апелира до Бошкоски да не се прави жртва и да не прави, како што велат, спектакл од некоја техничка грешка, за која партијата не е сигурна до крај, дека самиот не ја направил намерно за да привлече внимание и да се прави жртва.
Посакуваме без непотребни сценарија и дебати за страв од ликвидација или за основањето на партијата, граѓаните да го изберат најдобриот кандидат, стои во реакцијата на ВМРО-ДПМНЕ.
a1
