Гласачкото ливче ќе биде позаштитено од парите
Деветкратната заштита е гаранција против фалсификување на ливчињата
Гласачкото ливче за вонредните парламентарни избори ќе биде позаштитено од парите, тврдат во Државната изборна комисија.
За сите шест изборни единици ќе се испечатат гласачки ливчиња во иста, бела боја, одлучи ДИК на вчерашната седница.
На предната страница од ливчето стои нумерација за секој учесник во изборната трка, со името и презимето на носителот на партиската, односно на индивидуалната листа. Истовремено ќе бидат испишани бројот на изборната единица, кратенката на општината и избирачката локација. „Овие елементи, заедно со деветкратната заштита од симболи, знаци, букви..., се гаранција против фалсификување и злоупотреба на гласачките ливчиња“, беше потенцирано на вчерашната седница, кога Државната изборна комисија ги утврди изгледот, формата и бојата на ливчето со кое ќе се гласа на предвремените парламентарни избори на 1 јуни.
Мнозинството членови на ДИК не ја прифатија сугестијата на заменик-претседателот и член Субхи Јакупи гласачките ливчиња да бидат испечатени во различна боја за секоја изборна единица. Не помина ниту предлогот на Јакупи за повеќејазичност на имињата на партиите и на носителите на листи на целата територија на државата, вклучително и во изборните единици каде што застапеноста на етничките заедници е под 20 проценти.
Субхи Јакупи оцени дека се крши Изборниот законик со тоа што се „скратува правото на сите етникуми во земјата на денот на изборите да ги најдат кандидатите на кои сакаат да им ја дадат довербата“. Според него, сите гласачи што не го знаат македонскиот јазик ќе бидат принудени на избори да дојдат со преведувачи. Притоа, тој се обрати до претседателот на ДИК, кого го потсети дека пред две години кога се расправале за просторот што ќе добијат коалициите на ливчето „за милиметри најавил оставка“.
Шефот на Државната изборна комисија, Јован Јосифовски, подвлече дека гласачкото ливче ќе се изготви според Уставот и според Изборниот закон. Тоа подразбира дека во општините каде што етничките заедници се повеќе од 20 проценти, името и презимето на кандидатот, односно името на партијата, да бидат напишани и на јазиците на заедниците. Тања Алтанџиева оцени дека ДИК не е во ситуација да навлегува во правно, но и политичко барање кое не е само „двојазичност, туку и повеќејазичност на цела територија на државата“.
