Инвестициски бум ја погоди Македонија
Во периодот од јануари до јули годинава во државата влегле странски директни инвестиции (СДИ) во вкупна вредност од 130,5 милиони евра, што е за 42 милиона евра, или за 47,7% повеќе од истиот период лани
Инвестициски бум и се случи годинава на Република Македонија.
Во периодот од јануари до јули годинава во државата влегле странски директни инвестиции (СДИ) во вкупна вредност од 130,5 милиони евра, што е за 42 милиона евра, или за 47,7% повеќе од истиот период лани. Според најновиот извештај на Народна банка на Македонија, во јули годинава во државата влегле странски директни инвестиции во вредност од 29,1 милион евра.
Значајно влијание за раст на инвестициското салдо на државата имаат технолошко-индустриските развојни зони кои последниве две години се полнат со фабрики, кои го билдаат и извозот на државата. Според очекувањата на вицепремиерот и министер за финансии Зоран Ставрески, во ТИРЗ се очекуваат нови инвеститори, уште вработувања и зголемен извоз.
- Концептот на Владата за привлекување странски инвестиции дава се повеќе резултати. Само во зоните Скопје 1 и Скопје 2 имаме 1.350 вработени, а во зоната во Штип 750 вработувања. Дополнително очекуваме да има нови вработувања и да се зголемува извозот иако и сегашните 700 милиони евра извоз на компаниите кои работат во ТИРЗ е огромна бројка и веќе претставува над 20% од вкупниот извоз на Република Македонија - вели тој, забележувајќи дека Бунарџик сега е модерно опремена зона која им ги нуди сите потребни услуги на инвеститорите.
Би било добро, потенцира тој, лицата кои коментираа дека Бунарџик е една ливада сега да дојдат, да ги видат големите фирми како Џонсон контролс, Џонсон Мети, Кемет електроникс, Технокозе и да го видат целокупниот резултат на напорите на Владата и посветеноста да се привлечат странски инвестиции и да се создадат услови за нивно работење во зоната.
Во Македонија се предвидени 15 зони, од кои до сега се основани девет, а во функција се три: Скопје 1, Скопје 2 и зоната во Штип. Во скопските зони се сместени производствените капацитети на Џонсон Мети, Џонсон Контролс, Кемет Електроникс, Продис, Текнохозе и Ван Хул.
- Наскоро се очекува зголемување на инвестициите во државата со отворање нови производствени капацитети, но и со проширување на постоечките - најавува директорот на дирекцијата за ТИРЗ, Виктор Мизо.
Скопје 1 е првата и засега најразвиената ваква зона во Македонија. Во текот на 2012 година компаниите кои се лоцирани во неа инвестираа над 57 милиони евра, додека оваа година се очекува нивните инвестиции да надминат 60 милиони евра. Во фабриките во Скопје 1 и Скопје 2 засега се вработени 1.350 лица, а годинава се очекува да има над 1.500 вработени. Исто така, годинава се очекува овие компании да извезат производи во вредност над 700 милиони евра.
-Ние како Дирекција ќе продолжиме да ја реализираме зацртаната визија за изградба и развој на зоните во Македонија како комплекси што ќе овозможат рамномерен регионален развој на државата - најавува Мизо.
(С.Ву.)
Охридска банка со експозитура во Бунарџик
Охридска банка Сосиете женерал отвори експозитура во ТИРЗ Бунарџик. Експозитурата е сместена во административната зграда и единствена во зоната. Според претседателката на Управниот одбор на Охридска банка, Јитка Пантиучкова, ова е многу значајна инвестиција не само за банката, туку и за сите други компании во Бунарџик и за нивните вработени, со оглед на фактот дека ќе имаат банка во својата околина и трансакциите што ќе ги вршат ќе бидат полесни од досега. Таа рече дека работат на оваа експозитура е организирана според стандардите на Сосиете Женерал групацијата.
Вицепремиерот и министер за финансии Зоран Ставрески, кој присуствуваше на вчерашното свечено отворање на експозитурата оцени дека сега ќе им станат подостапни банкарските услуги на компаниите од Бунарџик, а истовремено ќе и се даде и поголема атрактивност на зоната.
Бум!
Но затоа тука се Велес и Прилеп со 70 000 жители и 90% невработеност.
кои ја мразат Македонија.
