СП Група Ц: Сега или никогаш за „Гордиот Албион“
Англија не само што е голем фаворит во групата Ц во која се наоѓаат уште и САД, Алжир и Словенија, туку „Гордиот Албион“ е еден од главните претенденти за симнување на „Аѕурите“ од светскиот фудбалски трон. Англичаните на титула чекаат уште од далечната 1966 година и можеби дојде време по четири и пол децении сериозно да се вклучат во трката за круната со Италија, Бразил, Шпанија, Аргентина и останатите.
На клупата го имаат прекалениот италијански стратег Фабио Капело, кој успешно ги водеше во квалификациите остварувајќи девет победи во десетте натпревари. Исто така, Капело го има сезонава феноменалниот Вејн Руни кој постигна 9 голови за националниот тим и над 30 за Јунајтед во сите натпреварувања. За квалитетите на Тери, Фердинанд, Џерард и Лампард не треба да се трошат зборови.
- Многу сме јаки и можеме да се носиме со сите најдобри селекции на светот. Многу сум среќен со играчите, односно групата која ја имам на располагање. Имам голема доверба во нив. Бидете уверени дека Германија 2006 нема да се повтори. – вети Капело.
За второто место во групата кое исто така води во следната фаза ќе се борат САД и Словенија. Од 1994 година кога беа домаќини, Американците не пропуштија ниту едно Светско Првенство, а во 2002 во Јапонија и Јужна Кореја дотуркаа дури до ¼ финалето. Селекторот Боб Бредли на располагање има добро познати имиња како Лендон Донован, Тим Хауард, Огучи Онијеву и ДаМаркус Бизли.
- Мислам дека имаме солидни шанси да ја минеме групата. Купот на Конфедерации минатото лето нас не научи дека секој гол и бод се исклучително важни на вакви натпреварувања. И натаму сме со високо подигнати глави, свесни дека можеме да победиме секого. Фокусирани сме на првиот меч против Англија, па за понатаму ќе видиме.- изјави еден од најпознатите и најдобар играч на САД, Лендон Донован, кој настапува за тимот на Евертон во англиската Премиер лига.
Иако на Американците им се даваат повеќе шанси за минување на групната фаза, сепак и Словенија не е за потценување, а тоа најдобро го осети Русија која беше елиминирана во баражот. Селекторот Матијаж Кек на најдобар начин го склопи мозаикот и создаде респектабилен тим предводен од голманот на Удинезе Самир Хандановиќ и напаѓачот Миливоје Новаковиќ. По распадот на Југославија, Словенците играа на ЕП во 2000 и СП во 2002, па ова ќе биде трет нивни настап на големите натпреварувања.
- Мислам дека Англичаните можат да го освојат СП. Ова е последна шанса за една брилијантна генерација да се закити со трофеј и тоа секако ќе биде голема мотивација за нив. – изјави словенскиот селектор, потенцирајќи дека е добро што со фаворитот во групата ќе играат во последното трето коло, бидејќи според него веќе многу работи ќе станат јасни дотогаш.
Алжир е тотален аутсајдер во групата, но се вратија на Светските Првенства по 24 години пауза, и тоа во голем стил. Прво го елиминираа Сенегал , а потоа и Египет. Најпознати играчи кај Алжирците се Зиани од Волфсбург, Бугера од Ренџерс, Белхаџ од Портсмут и Гезал од Сиена. Посакуваат пласман во втората рунда, но желбите се едно, а можностите нешто сосема друго.
- Посакуваме да ги победиме сите во групата. Лично, ќе „летам“ на теренот бидејќи сакам да го напуштам како победник. Наша реална цел е пласман меѓу 16-те најдобри селекции.- изјави играчот од средниот ред на Борусија Менхенгладбах Карим Матмур, кој очигледно нема проблем со оптимизмот.
извор http://www.kurir.com.mk/index.php/sport/60-sport/13040-gordiot-albion
