Банковиќ сака да го купи Вардар
Играчот на црвено-црните од 1980-тите години, а денес бизнисмен, бара клубот прво да прогласи стечај
Миодраг Мицковиќ
Зоран Банковиќ е познато фудбалско име во Македонија. За Вардар има одиграно 200 натпревари во Првата лига на СФР Југославија. Играше заедно со Мутибариќ, Ѓоре Јовановски, Перица Груевски, Кочо Димитровски, Васил Рингов, со Тони Савевски, Томче Трајановски, со Атанас Грнчаров, Гордан Здравков, Жарко Оџаков, Пепи Георгиевски во 1980-тите години, кога Вардар имаше силен тим, еден од најдобрите во неговата богата историја. Беше миленик на навивачите, бескомпромисен борец на теренот, играч кој знаеше да го поттикне целиот тим да игра добро, да се бори за секоја топка. Популарниот Бане беше и остана запаметен како еден од најдобрите играчи од Србија што го носел црвено-црниот дрес. По Вардар играше со голем успех во Црвена звезда, но тешката повреда подолго време го оддалечи од теренот, за кариерата да ја заврши во Раднички од Ниш. Играше една сезона и за Куманово. Денес живее во градот покрај Нишава како познат бизнисмен со своја градежна фирма и со повеќе ресторани во Ниш и во Лесковац, каде што ја започна кариерата во дресот на Дубочица.
Престојот во Скопје и настапите за Вардар Банковиќ никогаш нема да ги заборави. Мошне често е гостин во нашиот град, каде што има голем број пријатели, а имавме можност да го видиме и на трибините на Арената „Филип Втори“ на мечевите на Вардар.
„
Не е тоа оној Вардар за кој јас играв и кој ми остана во срцето“, ни раскажуваше Зоран Банковиќ, кој деновиве престојуваше во Скопје. „Гледам со какви се' проблеми се бори, како сите да кренале раце од него, а забораваат дека Вардар е фудбалски уникат во Македонија, кој никој не може да го замени, без оглед на сегашната лоша ситуација во која се наоѓа. Јас сум подготвен да го преземам Вардар, да не кажам да го купам, но само ако клубот прогласи стечај, да се знае точно колку и на кого му должи, да има чисти сметки. Ги почитувам сегашните спонзори на Вардар, добро е што некој сака да му помогне и да го извлече од кризата. Но, слушам дека и меѓу нив има некои недоразбирања. Не е мое тоа да го коментирам, сакам да кажам и повторно да нагласам, подготвен сум да го купам Вардар, но реков со чисти сметки. На мене останува како ќе најдам средства, има кој покрај мене финансиски да помогне. Вардар мора да биде она што беше“.
Зоран Банковиќ сето ова го кажа мошне сериозно. Има свој капитал, тоа не е спорно, а неговата желба е во Вардар да ги врати неговите поранешни тренери и играчи. Не крие дека, доколку би станал газда на Вардар, за тренер би го ангажирал Ѓоре Јовановски, би ги вратил голманот Благој Георгиев и Пепи Георгиевски, за кои во моментот нема место во Стручниот штаб на сегашниот тренер Илчо Ѓорѓиоски.
Според неговата визија, Дарко Панчев, фудбалската легенда на Вардар и на Македонија, би бил претседател или директор на клубот, а Кочо Димитровски спортски директор.
„Во Управниот одбор на клубот би морале да членуваат неговите легенди Мето Спасовски, Мирко Илиевски, Петар Шулинчевски, Атанас Мечкаров, Диме Георгиев. Жално е фудбалерите што го прославија Вардар, кои го носеа целиот товар на плеќи во Првата лига на Југославија, денес да се далеку од клубот, речиси избркани“, ни рече на крајот Банковиќ. „Во Црвена звезда, во Раднички, старите играчи не се зазборавени. За нив вратите во клубот се секогаш отворени. Во Вардар не е така поради погрешната клупска политика
Доколку во ова има барем пола вистина тоа би било супер за Вардар
1.bold За ова е потполно во право но да бидеме реални не постои теоретска шанса Камчев да излезе од Вардар без да земе некоја огромна сума на пари.
2.bold Е овде малце влегол во некој филм овој
Па по тој систем една утакмица не треба да се одигра. Да не има у Турново соблекувални или чувај Боже помошни терени за тренинг... 
