Очигледно незнаеш
21.06.2007 00:00 За само еден месец по втор пат принудно е приземјен владиниот авион. „Лирџетот“ од синоќа се наоѓа во хангарите на Скопскиот аеродром, не смее да лета се додека не му се промени компјутерот за навигација.
Откажа синоќа половина час по полетувањето од Александар Велики, а во авионот беше лично премиерот Никола Груевски. Од владата убедуваат дека дефектот не бил сериозен.
„И од причини, што за ваков тип на летови имаме нула толеранција за било каков тип на грешка, пилотите донеле одлука авионот веднаш да слета назад, на Скопскиот аеродром“, изјави Ивица Боцевски, портпарол на Влада.
„Премиерот бил известен за оваа процедура и сосема мирно и релаксирано, со останатиот дел од делегацијата, слетале на Скопскиот аеродром“, додаде Боцевски.
Како што вчера објави А1 системот за навигација се појавил во близина на Сараево и пилотите донеле одлука авионот да се врати назад.
„Префрлија на резервен и одлучија веднаш да се врата и да видат што се случува. Слетаа безбедно без никакви проблеми“, вели Тони Пргомет, раководител на сектор за контрола на летање.
Иако авионот веќе зачести со дефекти, владата тврди дека редовно бил сервисиран. Се обидуваат да докажат дека е безбеден.
Со него не летал само владиниот врв, туку бил рентан и на приватни фирми.
„Владиниот авион редовно се сервисира. Сервисерот е истата компанија од каде што е и купен авионот, односно станува збор за „Бомбардиер“. Според нивните најстроги критериуми за сервисирање на авиони, тие го сервисираат владиниот авион“, рече Боцевски.
Но нема одговор од владината служба дали е реагирано до производителот на авионот.
Ова е втор инцидент со новиот владин „Лирџет“. Пред еден месец, на пат од Брисел кон Скопје, авионот со кој леташе министерот Еленовски мораше принудно да слета во Минхен, затоа што откажа генераторот.
„Лирџетот“ е единствениот авион од владината флота кој е во возна состојба. Македонската влада го купи пред две години за 11 милиони долари. Има уште еден „Лирџет“, но тој со години е неупотреблив.
„Кингерот“ се урна во близина на Мостар. Официјално, претседателот Трајковски загина поради грешка на пилотите.
Груевски синоќа остана во Скопје, но сепак успеа да стигне во Брисел со комерцијален лет.
