НАШИОТ ШАМПИОН ПОБАРА СЕРТИФИКАТ ЗА ПИКЕРОТ ОД ХРВАТСКА
Бошњак одново меѓу ѓорчепетровки
Јуниорската репрезентативка на Хрватска, Сандра Бошњак е одново меѓу ѓорчепетровки и тренерот Глигоров ќе смета на нејзините услуги за дуелот со Ѓер, кој ќе се одигра в петок, во СРЦ "Кале", од 20 часот.
Ѓорче Петров веќе побара сертификат од Ракометната федерација на Хрватска, така што се очекува формализирање на сите работи, за да може Бошњак да стекне право на настап за петочниот дуел. Таа беше дел од редовите на нашиот шампион уште пред почетокот на сезоната, но поради проблемите кои беа присутни во тимот по откажувањето на спонзорот одлучи да си замине и продолжи да настапува за Локомотива.
Сепак, најновите информации говорат дека Бошњак е одново во Скопје и ќе продолжи со тренинзите со тимот на Ѓорче Петров. Таа беше прогласена за најдобар пивот на последното Светско првенство за јуниорки на кое со Хрватска се пласираше на 6. позиција. Се работи за висока ракометарка, која пред с$ игра добро во одбраната и ќе биде од голема помош за средбите од Лигата на шампионите.
Што се однесува до подготовката за дуелот со Ѓер од Унгарија, кој се игра в петок, од 20 часот, тренинзите се сконцентрирани на тој дуел и засега с$ оди според планот. Имаше и дел од девојките кои се пожалија на повреди, но тренерот Глигоров е уверен дека на натпреварот со Ѓер ќе ги има на располагање сите ракометарки.
"Имавме повредени ракометарки, но тие полека се приклучуваат на тренинзите и продолжуваат со работа. Се надевам дека и Пецевска и Младеновска ќе бидат подготвени за да можат да настапат в петок и да можеме да бидеме комплетни на дуелот со Ѓер. Нашите мисли се сконцентрирани кон тој меч и неделава сме комплетно посветени на стартот во Лигата на шампионите", вели Глигоров.
До одигрувањето на натпреварот со Ѓер остануваат уште само три дена кога ќе треба да се покаже квалитетот на дело и да се потврди дека и покрај сите случувања ѓорчепетровки знаат како да стигнат до успех и уште еднаш да го совладаат Ѓер. Пред паузата поради Европското првенство, Ѓорче Петров ќе одигра уште два меча. На 9 ноември тимот гостува во Русија на екипата на Звезда Звенигород, додека на 15 ноември се игра натпревар во Данска против Икаст. Другите три средби се играат во јануари, кога продолжуваат натпреварите во кои ќе има два меча на домашен терен.
Д. М.
ОДБРОЈУВАЊЕ ДО СТАРТОТ НА НОВАТА СЕЗОНА ВО ЛШ КАЈ ДАМИТЕ
Првите средби, в петок
Со натпреварите меѓу Подравка-Лада и Ѓорче Петров-Ѓер стартува новата сезона во Лигата на шампионите во женска конкуренција. Тоа се првите дуели од првото коло со кои ќе биде означен почетокот на сезоната во лигата, која ќе понуди многу возбудувања.
И сезонава играат вкупно 16 екипи кои се поделени во четири групи од по четири екипи. Тие ќе се борат за место во следната фаза во која ќе играат најдобрите два тима од секоја група.
ЛИГА НА ШАМПИОНИТЕ
1. КОЛО
ГРУПА "А"
Ѓорче Петров (Мкд) - Ѓер (Унг) 31.10.
Икаст (Дан) - Звезда З. (Рус) 01.11.
ГРУПА "Б"
Будуќност (Ц. Гор) - Елда П. (Шпа) 01.11.
ФЦК (Дан) - Хипо (Аут) 02.11.
ГРУПА "Ц"
Подравка (Хрв) - Лада Т. (Рус) 31.10.
Влчеа (Ром) - Ларвик (Нор) 02.11.
ГРУПА "Д"
Мец (Фра) - Виборг (Дан) 01.11.
Нирнберг (Гер) - Крим М. (Сло) 02.11.
Утре, прес за натпреварот
Со почеток во 12 часот, во просторијата за прес, во салата во СРЦ "Кале" утре тимот на Ѓорче Петров ќе одржи средба со новинарите. Прес-конференцијата ќе биде одржана по повод претстојниот дуел од Лигата на шампионите против составот на Ѓер кој се игра в петок.
Во Петок сите на Кале да го бодриме Ѓорче Петров !!!!