"Одмор" за Коби и Гасол во претсезоната
Коби Брајант и Пау Гасол би можеле да добијат "поштеда" од тренерот Фил Џексон за оние претсезонски натпревари.
Јасна е и причината поради која би следела една ваква одлука на стручниот штаб на ЛА Лејкерс, посебно ако се знае дека тандемот Брајант-Гасол беше и "највработениот" во составот на "езерџиите" во текот на летото, секако поради настапот на Олимпијадата во Кина.
Брајант освои златен, а Гасол сребен медал во Пекинг, но потрошија, посебно Шпанецот, добар дел од своите "капацитети".
"Не сакам да кажам дека Коби нема да ги игра тие натпревари само затоа што се егзибициски. Но тоа е шанса да не игра токму поради карактерот на натпреварите" - смета Фил Џексон.
Само потврди дека во наредната сезона ќе се обиде да го ограничи бројот на минутите за Коби, поточно, ако е тоа можно, да ги намали.
Најкорисниот играч на НБА во ланскиот шампионат во оној регуларен дел влегува како триесетгодишник во својата 13. НБА сезона. Лани во просек играше нецели 39 минути по натпревар во кои реализираше по 28.3 поени.
"Мислам дека Фил прави многу добра работа и сигурен е дека знае како да останеме во добра кондиција. Но морам да признаам дека не н$ притиска премногу бидејќи знае дека имавме долго лето"- вели Брајант."Се чувствувам одлично. Можам да трчам цел ден. Во добра форма сум и подготовен".
Првиот "пробен натпревар" тимот од ЛА ќе го игра на 7 октомври.
