Кака влезе во автобусот на Реал Мадрид Ѕвездата на европскиот шампион Милан, Кака се качи во клупскиот автобус на Реал Мадрид. Сепак, во превозното средство на „кралевите“ се задржал само неколку секунди, по што се симнал и се упатил кај соиграчите.
Одличниот 25-годишен бразилски играч од средниот ред на турнирот во Москва ги измешал автобусите на двата клуба и се качил во оној што ги превезувал играчите на Реал Мадрид. Фудбалерите и раководството на Реал М. со аплауз го проследија влегувањето на Кака во автобусот, а челниците на Милан со зачуденост го проследија потегот на Бразилецот. Медиумите веднаш пренесоа дека плејмејкерот на „росонерите“ со овој потег им дал до знаење на претседателот Силвио Берлускони и на тренерот Карло Анчелоти каде сака да ја продолжи кариерата.
Шпанскиот шампион на сите можни начини се обидува бразилскиот ас да го доведе на „Сантијаго Бернабеу“ и предлага астрономски суми за отштета. Меѓутоа, Милан не сака ни да слушне за негова продажба и „росонерите“ се трудат да го задржат во своите редови до крајот на кариерата.
На фудбалскиот турнир „Куп на руските државни железници“, освен Милан и Реал М., настапуваа и домаќинот Локомотив Москва и ПСВ Ајндховен.