Ајде Вардар, со нов тренер:
Брацо е во Сараево за Каталиниќ!?
* "Не можам ништо да ви кажам, во Сараево сум и денеска се враќам назад во Скопје", се зборовите на спонзорот на клубот.
Ќе добие ли Вардар нов тренер до дербито в сабота со Работнички? Тоа е прашањето кое сите го поставуваат. Многу е веројатно дека ќе биде така. Спонзорот на Вардар, Слободан Вујчиќ - Брацо, е во Сараево. Како што дознавме, во преговори за нов тренер на Вардар. Нашите информации говорат дека Иван Каталиниќ, хрватскиот тренер кој моментално седи на клупата на второлигашот Гошк, е најблиску до преземање на нашиот најтрофеен клуб. Па така логично е Брацо да седне и да разговара со Каталиниќ за негов ангажман во "црвено-црните".
"Сега не можам ништо да ви кажам. Денеска се враќам во Скопје и ќе знам многу повеќе", е коментарот на Брацо, кој го добивме од Сараево.
Каталиниќ изјави дека би сакал да работи во нашиот најтрофеен клуб и дека чека од раководството на Вардар да добие повик за преговори.
"Би сакал да работам во Вардар, само треба да имаме официјални преговори", е изјавата на Каталиниќ за нашиот весник.
Оваа "сапуница" за тренер на Вардар треба да добие конечна завршница веќе денеска. Како што најави Вујчиќ, до дербито со Работнички клубот ќе добие нов "шеф", а Каталаниќ е многу блиску до таа улога. Се чини нашите Зоран Стратев и Слободан Горачинов веќе се отпаднати од комбинација, а освен Каталиниќ неофицијално се шпекулира и името на сегашниот тренер на Зрински, Блаж Слишковиќ дека би можел да го наследи Драган Канатларовски, кој на самиот старт од првенството си замина од клупата на Вардар.
И на вчерашниот тренинг с$ беше по старо. Мирко Петров ги предводеше "вардарците", човекот кој седеше на клупата на најтрофејниот на натпреварите против Шкендија и против Милано.
Г. Бошев
Половина екипа на тренинг
Мирко Петров во моментов се соочува со проблеми околу водењето на нашиот најтрофеен клуб. Вардар во моментов има половина екипа на тренинг. Од стандарните недостасуваат голманот Георгиевски и Савиќ, кои имаат обврски со "А" селекцијата, додека Пеев и Костовски се со младата репрезентација. Бојовиќ и Перендија поради повреди ги нема на тренинзите, додека Деспотовски е во потрага на ангажман.