Капело си замина од Јувентус
Фабио Капело од вчера повеќе не е тренер на екипата на Јувентус.
"Уште пред неколку недели имавме разговори со Капело, кој реши да не ја прифати нашата понуда за нов договор. Затоа решивме да ја прифатиме оставката што тој ја поднесе денеска. Му благодариме за фантастичната работа со нашиот тим во последните две години и му посакуваме многу среќа во идните ангажмани", стоеше во клупското соопштение на "Старата дама".
"Не е никаква тајна дека Реал Мадрид се интересираше за Капело. Кога Калдерон ги доби претседателските избори стана јасно дека Дон Фабио ќе премине на Сантијаго Бернабе. Никој во Јувентус не му се лути на Капело за направениот избор, ние ќе продолжиме да напредуваме, но со друг стратег на клупата", изјави спортскиот директор на Јувентус, Марко Тардели.
Најсериозни кандидати за наследници на Дон Фабио на кормилото на Јувентус се Дидие Дешамп и Алберто Закерони.
Шпанските медиуми пренесуваат дека Капело најдоцна до крајот на оваа недела ќе биде промовиран во нов тренер на "кралевите". Негова прва желба од претседателот Калдерон ќе биде да му го доведе крилниот фудбалер на Бетис, Жоакин. Дури по дознавањето на пресудите во италијанскиот скандал, Капело ќе реши кои фудбалери на Јуве да ги доведе кај себе во Реал, иако досега најмногу се споменуваа имињата на Емерсон и Ибрахимовиќ.