Стојан Андов и Либералната партија застанаа на страната на Грција. Македонскиот државен врв е во фаза на подготвување контрамерки доколку Грција стави вето на поканата од НАТО до Република Македонија, во април. Во ексклузивната информација објавена на ТВ Сител, во саботата, тие планови беа објавени како контрамерки во 12 точки со план: што ќе биде - ако ветото го биде.
Тоа се први мерки во период од 15 години, кои Македонија ги најавува како возврат на постојаните грчки блокирања, државни оспорувања, притисоци за промена на знаме и Устав... И сето ова беше успешно спроведено од грчка страна. Контрамерките наидоа на општа поддршка во јавноста, во секое анкетирање и контакт со граѓаните, како ретко кога во друга прилика, тие дадоа речиси стопроцентна поддршка на најавените контрамерки од државниот врв.
Првите реакции во грчките медиуми беа изненадување од новите елементи на македонската политика кон грчките условувања. Во грчките медиуми таа политика беше оценета како радикален пресврт.
Со истите, грчки оценки, се јавија Стојан Андов и Либералната партија. Колку за Грците е изненадување тврдиот македонски став кон нивното вето, толку за Македонија не е изненадување ставот на Стојан Андов, кој повторно е на страна на Грција.
Познато е дека повеќе луѓе од врвот на партијата имаат тесни бизнис врски со Грција. Познато е дека Андов беше и против самостојноста на Република Македонија во 1990/91 година, при што и македонската независност ја дочека во Грција. Долгогодишното латентно застапување на грчките ставови и бизнис интереси (случај ОКТА и други) во Република Македонија, Стојан Андов конечно и јавно ги дефинираше со својот повик - немојте да ја лутите Грција.
Одговорност за овој став, кој граничи со национално предавство, Стојан Андов ќе мора да го објасни на своите малубројни членови, но и на целата македонска јавност.
Во неговото соопштение помеѓу останато се вели:
- Извршниот комитет на Либералната партија оценува дека процесот на евроатлантско интегрирање на Македонија се одвива позитивно и оти е се поизвесно дека државата ќе добие покана за членство во НАТО во април, а наесен и датум за преговори за полноправно членство во ЕУ. Тоа од сите фактори во политиката во нашата земја бара крајно внимателно, тактично и промислено дејствување. Затоа, ЛП смета дека особено во овој момент дејствуваат дисонантно некои радикални новинарски истрчувања, кои можеби се замислени како предупредување до Грција, а всушност на радикалните кругови во таа земја може да и послужат како главен аргумент да го оправда своето евентуално вето за наш прием во НАТО, се вели во соопштението од ЛП.
Таквите искажувања, според ЛП, можат да ги збунат нашите пријатели во меѓународната заедница и да им ги одземат аргументите за поддршка на Македонија.
- Радикалните ставови досега не биле својствени на македонската надворешна политика која секогаш се потпирала на одржливи правни аргументи, ниту пак тие се резултат на сеопфатни разговори и согласност меѓу домашните политички чинители. Затоа државниот врв треба да најде начин да се огради од таквите новинарски искажувања за да тие да немаат штетен ефект, стои во соопштението од ЛП.
Инаку, за прецизно информирање на јавноста, и премиерот Груевски како и претседателот Црвенковски деновиве во Минхен, јавно рекоа дека ветото на Грција реално треба да се очекува, и дека е потребно на таа ситуација или превентивно да се делува или да се одговори. Стојан Андов не е дел од државниот врв и тој со оваа проблематика нема ништо заедничко.
И Црвенковски заигра тврдо на грчките провокации
Претседателот Бранко Црвенковски остро реагираше на провокацијата од грчката претставничка на завчерашната меѓународна сесија предавања, организирана од БМВ "Херберт Квант" Фондацијата, во Минхен. Таа упати протест до претседателот на Фондацијата од Германија бидејќи го најавил Црвенковски како претседател на Република Македонија, на што тој одговори дека само ги почитувал односите со Македонија, без да навлегува во спорот околу името што го имаат Скопје и Атина.
На грчката провокација не остана должен претседателот Црвенковски, кој пред обраќањето пред присутните, од говорницата директно и се обрати на грчката претставничка.
- Зошто 40 години не ви пречеше името Социјалистичка Република Македонија, а сега остро реагирате на секоја употреба на нашето уставно име? - рече Црвенковски, што наиде на одобрување од присутните во салата. Тој во своето обраќање на тема "Македонската иднина во нестабилно опкружување", рече дека Македонија е држава која никогаш, па ниту во периодот на внатрешните проблеми во 2001 година, не генерирала нестабилност во поширокиот регион.
- Токму поради тоа сме убедени дека позитивниот пример на нашата земја треба да биде пошироко поддржан затоа што идејата за европеизирање на регионот би се одвивала далеку поефикасно доколку сите држави бидат преокупирани со имплементирање на демократската и развојната агенда, согласно европските препораки и стандарди, објасни Црвенковски.
Шефот на државата истакна дека клучен настан оваа година ќе биде Самитот на НАТО во Букурешт, каде Алијансата ќе одлучува за своето проширување. Тој посочи дека Македонија долги години спроведува комплексни реформи со цел да ги исполни критериумите за влез во оваа организација, но постојат најави од некои земји-членки на НАТО дека во случајот на нашата земја би можеле да бидат применети некои нови, нестандардни услови за прием.
- Ако такво нешто навистина се случи, тоа би значело непринципиелно форсирање на индивидуалните наспроти колективните интереси на Алијансата и ризично експериментирање во регион чија безбедност на стабилизација не е дефинитивно завршена, рече шефот на државата.
На последните државнички настапи на Црвенковски, вчера реагираше шефицата на грчката дипломатија Дора Бакојани. Таа уште еднаш го повика македонскиот претседател да ја напушти острата реторика и да прифати сериозни преговори за името.
Вечер