Човек може да биде патриот онолку колку што ќе му дозволи државата, институциите кој што ја водат, во крајна инстанца онолку колку што ќе му дозволи општеството, ништо повеќе од тоа.
Денес, во овие услови постојат разни струи кои што патриотизмот сакаат да го претстават како демоде. Јас сум патриот кога игра нашата репрезентација, кога ќе слушнам дека некој македонец успеал таму некаде со свој труд, за луѓе кои што преку знаење и талент ја претставуваат оваа држава пред светот. Толку е моето патриотско поимање, за други работи се водам од рационалност, сопствени убедувања и сум прагматичен.
Да се биде македонец денес не е доволно само да се рече дека некој е патриот. Да се биде македонец значи да се страда. Јас сум поголем македонец од многумина што се иселиле надвор и се чукаат во гради дека се патриоти. Зошто?
Затоа што го трпам комшијата кој што го фрла ѓубрето кај мене пред порта во најлонски кеси, не дава 500 денари за канта за ѓубре. И после маалските џукели копаат по него и го сеат по цела населба.
Затоа што одам на интервју за работа и дотичната ме прашува: - кој те испрати? Очекува дека ме пратил некој од партија или пријател.
Затоа што рмбам за 200€ плата кај полуписмени партиски ботови кои што се "снашле" со тоа што главите му се закопани како на ноеви во песок во аналните регии на нивните партиски претпоставени, локални функционери.
Затоа што последното работно место значеше дека треба да пржам компири на фритеза. И не ме примија оти дојде некој со "пријател". Во оваа држава ти требаат врски за да го допреш дното.
Затоа што сум вложил 18 години од мојот живот во образование и еден куп пари за на крај да треба да бирам меѓу: фритеза, партија или бугарски.
Затоа што како студент си чистел WC-иња во Мекдоналдс за да собереш некој денар за факултет и одмор на крај од сезона.
Затоа што пола од пријателите ти се надвор а другата половина кај да е и таа ќе замине.
Затоа што на јавни собири се уште главна тема се Грујо, Заев и името, партијата а не кој каде бил, дека го унапредиле, дека добил повисока плата, купил нов стан...
И после нека дојде некој нека ми збори за тоа возвишено чувство како е да се биде патриот. Јас и сите ние овде најдобро знаеме што значи да си македонец.
Поголем патриотизам од тоа да си дел од македонското секојдневие дали постои?