Хеликоптерот бил подготвен за слетување, но добил наредба да почека, бидејќи во исто време на аеродромот „Александар Велики“ требало да слета и авион наМАТ,кој доаѓал од Цирих
Хеликоптерот на АРМ непосредно пред слетувањето добил наредба да почека и да му даде предност на патничкиот авион кој доаѓал од Цирих, дознава „Дневник“. До последниот момент од комуникацијата со контролата на летање на скопскиот аеродром, пилотот на армискиот хеликоптер „Ми-17“ не пријавил дефект на леталото, покажуваат првичните сознанија за несреќата. „Дневник“ неофицијално дознава дека пилотот последен пат му се јавил на контролорот во 12.13 часот. Се' уште е мистерија што се случувало со хеликоптерот од 12.05 часот во саботата, кога влегол во македонскиот воздушен простор од Косово, до моментот на несреќата. Според извори од Контролата за летање, екипажот на хеликоптерот не пријавил ниту дефект ниту итна ситуација кога влегол на македонска територија. Тој влегол во земјава над котата „Когат“ на границата со Косово. Од Контролата тврдат дека пилотот тогаш побарал да биде воден со радар во процедурата за слетување бидејќи имало сложени метеоролошки услови и намалена видливост до 3.000 метри поради магла. Наши извори, пак, објаснуваат дека од истите причини контролорот го насочил пилотот при слетувањето да го користи системот на инструменти.
Македонските мировници полетале од сараевскиот аеродром „Бутмир“ во 10.10 часот при нормални услови за летање. Поради тоа летот бил пријавен дека ќе се врши по процедурата ВФР (виа фар), односно по визуелно барање на котите, што значи дека пилотот има прегледност на условите на копно. Тоа значи хоризонтална видливост од минимум пет километри и надвишување над облаците од 1.000 фити. Во саботата напладне овие услови на скопскиот аеродром не биле задоволени. Затоа била променета процедурата на слетување.
Армискиот хеликоптер летал по воена рута преку Беране во Црна Гора, поминал над Косово и ја поминал нашата воздушна гранична линија над преминот Генерал Јанковиќ - Блаце. Потоа ја прелетал Скопска Црна Гора и бил подготвен за слетување на воениот дел од аеродромот „Александар Велики“. Според нашите информации, пилотот побарал од контролорот да лета на точката Папа Танго, која претставува уред во близина на пистата и им бил добро познат на воените воздухопловци. Но, добил инструкции да користи друга точка. Бидејќи слетувањето се вршело преку радар, според процедурата, хеликоптерот бил упатен да направи полукруг на јужната страна на аеродромот во правец на Катланово. За време на овој маневар, леталото било на висина од 700 метри над земјата. Но, во исто време на аеродромот требало да слета и авион на МАТ, кој доаѓал од Цирих, па на хеликоптерот му било наредено да почека со слетувањето.
Во Контролата за летање велат дека според процедурите, патничките авиони имаат предност за слетување пред воените хеликоптери, бидејќи се побрзи. Оттаму тврдат дека воените летала може да имаат предност само во итни ситуации, ако носат повредени, ако се погодени или ако имаат друг проблем.
Авионот на МАТ слетал на „Александар Велики“ во 12.10 часот, а три минути подоцна контролорот ја имал последната комуникација со хеликоптерот. По две-три минути, контролорот повторно го побарал екипажот, но немало одговор. Откако по неколку минути повторно не успеал да воспостави контакт со воениот пилот, била известена Службата за потрага и спасување.
