Многу глумци, малку играчи за Турција
Пописот на кошаркари кои го откажаа настапот на Светското првенство во Турција е подолг благодарејќи главно на играчите кои доаѓаат од Америка кои од приватни причини годинава нема да ги гледаме на Мундобаскетот. Олимписките игри очигледно многу повеќе им значат отколку светските првенства.
Интересно е дека Американците во сите свои спортови секогаш го истакнуваат големиот патриотизам и љубов кон својата татковина, но кога треба да настапат на едно силно натпреварување, дури тоа да биде кошаркарско светско првенство истите тие личности забораваат на големата љубов кон својата татковина. Правдата ќе беше задоволена ако Кошаркарскиот сојуз на Америка ги суспендираше од сите натпреварувања, но знаеме дека тоа нема да се случи. Затоа ќе ја чекаме 2012 година и ЛОИ во Лондон за да ги видиме оние за кои публиката најмногу доаѓа во спортските арени. Еве ја и листата на звучни имиња, кошаркарски, кои ги откажаа настапите на СП во Турција:
1.ЛеБрон Џејмс (Америка, Мајами Хит): Секому му е јасно дека заедно со Вејд и Бош летното време го минува во различни студија за снимања и интервјуа. Репрезентативните обврски на сегашниот МВП играч од регуланиот дел на сезоната во НБА лигата ќе може да причекаат.
2. Коби Брајант (САД, ЛА Лејкерс): Иако претходно најави дека ќе игра за селекцијата на САД на СП во Турција тоа нема да се случи. Во текот на сезоната имаше многу здравствени проблеми со палецот на раката, потоа грбот, а на крајот и со коленото кое мораше да го оперира. За враќање на терените ќе може да се зборува дури после 25 септември.
3.Стив Неш (Канада, Феникс Санс): Како главна причина за откажувањето Неш ги наведе своите години. Со 36 колку што ги носи на грбот ни најмалку не му беше лесно да ја издржи целата НБА сезона заради што дополнителен напор ќе му беа и подготовките за СП. Канаѓаните неговото откажување не го зедоа како зло.
4. Двејн Вејд (САД, Мајами Хит): Од приватни причини откажа бидејќи во летниот период нема премногу време за кошарката. Планираните интервјуа, фотографирањата и сето друго добија приоритет во однос на СП.
5. Двејт Хауард (САД, Орландо): И тој како и другите ѕвезди од приватни причини" откажа. Се приклучи на другите соиграчи кои и рекоа не на својата репрезентација.
6. Крис Бош (САД,Мајами): Еден од најдоминантните центри во НБА лигата поради приватни проблемии реши да не игра во Турција. Приватниот проблем неодамна излезе на виделина бидејќи се пресели на Флорида во редовите на Мајами каде ќе игра заедно со ЛеБрон и Вејд.
7. Дирк Новицки (Германија, Далас Маверикс): Ги откажа настапите а како главна причина ги наведе подготовките за новата НБА сезона.И натаму негов приоритет е со клубот да ја освои НБА титулата поради што 32- годишниот Германец реши да го прескокне СП.
8. Кармело Ентони (САД, Денвер Нагетс): Како главна причина за откажувањето ја наведе својата свадба. Тој неодамна вплови во брачните води и сака ова лето да се одмори од кошарката.
9. По Гасол (Шпанија, ЛА Лејкерс): Тој секогаш беше на располагање на репрезентацијата, но овојпат реши да го одмори своето тело и што е најважно не наиде на осуда од јавноста во Шпанија.
10. Андреј Кириленко (Русија, Јута Џез): Бројните повреди вклучувајќи ги и оние приватните проблеми го одалечија од репрезентацијата иако првобитно најавуваше дека сигурно ќе го носи дресот на Русија.
На оваа низа треба да се додат уште имињата како на пример Паркер, Џинобили, Минг, Богут, Удрих... кои исто така значат многу во светската кошарка, заради што и годинашнава смотра на Мундобаскетот ќе биде посиромашна.
