МАКЕДОНСКИ ХАКЕРИ ИМ ВРАТИЈА НА БУГАРСКИТЕ
Македонски хакери го нападнаа официјалниот веб-сајт на бугарскиот претседател Георги Прванов, како одмазда за хакерите што на 21 јануари поставија текст на бугарски јазик на страницата на македонскиот претседател Бранко Црвенковски.
„Имаме силни докази дека нападот врз македонскиот претседател беше план, нарачан и платен од бугарската влада, а го изведе хакерската група ТИМ ЛЗО. Трансферот на парите е направен преку „Прва карипска банка“, а крајната дестинација на парите е во Лос Анџелес“, пишува во текстот објавен на сајтот на бугарскиот претседател под кој е потпишана групата Македонски обединети сили.
Во директното писмо до Прванов тие се извинуваат за криминалниот упад на веб-страницата, велат дека на тоа биле присилени и дека се подготвени да војуваат на сите фронтови во „виртуелно и реално време“.
Хакерите му порачуваат на бугарскиот претседател дека ова може да заврши ако бугарската влада ја запре војната на Интернет што таа ја почнала.
„Ако ова писмо не го сфатите сериозно и нападите не престанат, имаме моќ и ресурси да го кренеме ова на повисоко ниво. Тоа значи дека бугарските компании нема да имаат сигурен бизнис во Македонија, бугарските дипломати ќе бидат напаѓани и дури убиени, а бугарската амбасада уништена“, се закануваат хакерите.
Пред неполн месец бугарските хакери на сајтот на Црвенковски поставија текст насловен со бугарското национално мото „Во обединувањето е силата“. „Велите дека се стремите да влезете во ЕУ, а во исто време продолжувате со некакви глупави лаги. Не заборавајте дека соединувањето не прави посилни. Да не ве потсетуваме во иднина на ова“, му порачаа бугарските хакери на Црвенковски.
Текстот на страницата на Црвенковски беше поставен на бугарски јазик. Македонските хакери му пишаа на Прванов на англиски јазик.
http://www.vreme.com.mk/DesktopDefault.aspx?tabindex=9&tabid=1&EditionID=1003&ArticleID=66031
))))
