Македонија лидер во регионот по невработеност и по ниски плати !
Ај реков да не отворам нова тема по денешнава информација....бидејќи тука веќе зборуваме за нашата економија !
Еве што пренесува нетпресс...
Од сите републики во поранешна Југославија најголема невработеност има во Македонија и во Босна и Херцеговина додека најмал број на невработени има во Црна Гора, било соопштено на завршната Меѓународна конференција на директорите на јавните служби за вработување на просторите на некогашната СФРЈ во Херцег Нови.
Билјана Јовановска од Агенцијата за вработување во Македонија на средбата детално ги образложила главните мерки кои владата ги усвои за поттик на вработувањето и ублажување на последиците од економската криза.
Јовановска навела дека околу 300 илјади луѓе во државата се наоѓаат на списоците на Агенцијата како невработени што значи дека стапката на невработеност во земјата е поголема од 30 отсто.
Директорот на Агенцијата за работа и вработување во Босна и Херцеговина Хуго Сариќ соопштил дека во моментов на пазарот на труд во таа држава има околу 450 илјади невработени.
Сариќ рекол дека стапката на невработеност во БиХ според официјалната статистика достигнува околу 40 отсто додека според истражувањето на Агенцијата за работа е далеку помала односно дека е околу 23 отсто во однос на вкупната расположлива работна сила. Сариќ додал дека најбарани професии досега во БиХ се фармацевти, лекари и инженери.
Податоците кои биле презентирани на тоа конференција покажале дека во Црна Гора во бирото за невработени за сега има 28.405 лица, односно околу 10,76 отсто од вкупната расположлива сила во таа република.
Директорот на Националната служба за вработување во Србија Владимир Илиќ на истиот собир изјавил дека во Србија има 400 илјади невработени но дека стапката на лица без работа не е поголема од 14 отсто додека пак независните аналитичари во Белград тврдат дека стапката на невработеност во Србија е далеку поголема од таа што ја наведува Илиќ и дека во моментов работа бараат околу 850 и 900 илјади лица.
На евиденцијата на хрватскиот Завод за вработување кон крајот на јануари имало нешто помалку од 254 илјади невработени, изјавила директорката на таа институција Анкица Паун Јарлах. Две третини од невработените во Хрватска биле лица со средно образование а најмалку, односно осум отсто се со виско и со виша стручна подготовка, додала Паун Јарлах.
Инаку за потсетување просечниот личен доход во Македонија изнесува околу 250 евра, во Хрватска 700, Словенија 1.500, Србија околу 400, БиХ околу 350, а Црна Гора околу 600 евра.