Грците "потопени"
МАКЕДОНИЈА - ГРЦИЈА (4:3) 7:6
(2:2, 2:1, 2:0, 1:3)
Базен: Олимписки - Центар. Гледачи: 2000, Судии: Д. Албан (Фра) и А. Вамос (Ром), Делегат: Н. Фироу (Гер), Контролор: Ј. Брито (Фра).
МАКЕДОНИЈА: Перчиниќ (15 одбрани), Рачуница, Вуксановиќ, Крстоношиќ 1, Босанчиќ 1, Кречковиќ, Делаш, Бркиќ 1, Димовски, ЛАтковиќ, Петровиќ 1, Бениќ 1, Милиќ 2. Исклучувања 5.
ГРЦИЈА: Ф. Константинос (9 одбрани), Кристодолус 2, Евангелос 1, Георгиос 3, Андреас, Јонис, М. Константинос, Александрос, Евгениос, Георгиос, Панајотис, Г. Константинос. Исклучувања: 6. Петерци: 1/1
Победа, победа, победа.... Олимписки експлодираше. Вака накусо може да се опише амбиентот на вчерашниот натпревар од 5. коло од Светската лига, во групата "Б" во која Македонија ја совлада Грција во Скопје со 7:6, полувреме 4:3. Воедно ова е прва победа за нашата селекција во натпреварите од Светската лига, а со тоа дојдовме до првите бодови. Перчиниќ, Рачуница, Вуксановиќ, Крстоношиќ, Босанчиќ, Кречковиќ, Делаш, Бркиќ, Димовски, Латковиќ, Петровиќ, Бениќ и Милиќ предводени од селекторот Нонковиќ и тренерот Кузамановски се хероите на годината. Тоа се момците кои нацијата барем за момент ја направија супериорна, среќна, самоуверена. Тоа се спортистите кои синоќа ни ја подарија најубавата победа, кога станува збор за меѓусебните средби со нашиот јужен сосед. Ова не беше вообичаен спортски натпревар. Ова беше повеќе од тоа. А, победата можеше да се почувствува и пред почетокот на средбата, во атмосферата.
Публиката, феноменална. Атмосферата - како за кого. За нашите - поддршка, за противникот - пекол. Навивање, бодрење, пеење, знамиња во жолто-црвена боја. Се развиори и најголемото знаме, со ѕвездата од Виргина, кое ја покри трибината. Тоа беше дополнителен стимул за сите во базенот, и за играчите и за публиката. Имаше и свирежи кои беа упатени кон противничките играчи, а богами летнаа и две авиончиња кои беа наменети за противникот, за мирен лет до Атина.
А, што да се каже за натпреварот. Крајно напнат с$ до крајот на првите две четвртини, односно до првото полувреме. Потоа следуваа одлични минути за нашите момчиња, што придонесе за водство од 6:3. Со тој резултат се влезе во последниот период кога како непишано правило следуваше мало опуштање кое Грците знаеја да го искористат. Впрочем, таа беше единствената четвртина која заврши со позитива за играчите на Јунанистан. Постигнаа три гола, наспроти нашиот еден. Можеби тоа беше тактичка одлука на селекторот, за во последните две минути да ги збиеме редовите, да одиграме максимално концентрирано. Впрочем, победа си е победа. Дали со еден или со десет гола носи исто, 3 бода. Како што почнавме така и завршивме - победнички.
Резултатот го отвори Босанчиќ за водство на Македонија од 1:0. Набрзо следуваше изедначување од пенал, па дури и пресврт. Успешен реализатор беше Кристодолус. Бениќ беше тој кој се погрижи првиот дел да заврши израмнето. Во втората четвртина поведоа Грците преку Георгиос, кој со три гола беше најефикасен играч на натпреварот. Тоа како да беше сигнал момците Македонци да заиграат со сета сила, со сиот свој жар. Не само што изедначија туку преку Крстоношиќ доаѓаме во водство. Третата четвртина со исто темпо. Петровиќ и Милиќ прецизни, за водство од 6:3, највисоко до тој момент, а и на целиот натпревар. За последната четвртина веќе рековме, 1:3 за противникот, што не беше доволно за изедначување на финалниот резултат.
А можевме да славиме и поубедливо. Имавме неколку поволни шанси, утнавме зицер, цепелин, неколку пречки, диреци. Имавме слаба реализација со играч повеќе, но ништо подобар не беше ниту противникот.
Сепак, ни Грците не играа лошо. Имаа одличи акции, упатија доста удари кон нашиот гол. Но нашиот чувар на мрежата Перчиниќ како да имаше спуштено ролетна. Одбрани 15 удари, наспротив Константинос, кој фати 9.
На крајот - кој губи има право да се лути. Со последниот свиреж на сирената и на судијата токму тоа се случи. Грците реагираа кај главниот судија, за наводно крадење на време, на три секунди, но без успех.
Д. Ѓенчевски
ГРУПА "Б" - 5. КОЛО
Македонија - Грција 7:6
Русија - Хрватска 7:12
ТАБЕЛА
1. Хрватска 13
2. Грција 8
3. Русија 6
4. Македонија 3
ИДНО 6. КОЛО (20.04)
Русија - Македонија
Хрватска - Грција
СТЕВАН НОНКОВИЌ - СЕЛЕКТОР (МКД)
"Јас и сега држам час"
"Оваа победа ја подарувам на Македонија, на народот, на оваа прекрасна публика. Верував во овој состав. Секогаш бевме блиску до победата, и со Хрватска и со Русија во Скопје и со Грција во Атина. Ни недостигаше спортска среќа. Овој пат имав и едно изненадување за сите. Го повикав искусниот Милиќ, кој даде одлична партија. Одржавме вистински час по ватерполо. Јас и сега држам час."
НЕБОЈША МИЛИЌ - (МКД)
Одлична атмосфера, прекрасна публика
"Одлична атмосфера, прекрасна публика. Почнавме агресивно. Таквата игра сама по себе носи и одредени грешки, но со борбеност со желба за успех успеавме сето тоа да го анулираме, да го надоместиме."
