Календар за имунизација - Имунизацијата против одредени заразни болести
Задолжителна активна имунизација
на лица на одредена возраст, која се спроведува континуирано, во текот на целата година против: акуен вирусен хепатит Б (Hepatitis B), туберкулоза (Tuberculosis), заболувања предизвикани од хемофилус инфлуенца тип Б (Hib), дифтерија (Diphtheria), тетанус (Tetanus), голема кашлица (Pertussis), детска парализа (Poliomyelitis acuta), мали сипаници (Morbilli), заразни заушки (Parotitis epidemica), црвенка (Rubeоla), инфекции предизвикани од хуман папилома вируси (HPV), инфекции предизвикани од ротавируси и инфекции предизвикани од Streptococcus pneumoniae за сите лица на одредена возраст согласно Календарот за имунизација.
-Имунизација против акутен вирусен хепатитис Б, задолжителна активна имунизација против акутниот вирусен хепатит Б се врши со давање на три дози HB (Хепатитис Б) вакцина, како поединечна или во состав на поливалента вакцина.
- HB вакцина
На сите новородени деца во 2022 година, на возраст определена со Календарот за имунизација:
Првата доза на вакцина се дава во родилиште како поединеча HB вакцина, во тек на првите 24 часа по раѓање, а децата кои не се родени во родилиште се вакцинираат веднаш, во надлежната установа која спроведува вакцинација.
Втората доза на вакцина се дава на растојание не пократко од еден месец по давање на првата доза.
Третата доза на вакцина се дава на растојание не пократко од шест месеци после давање на првата доза, односно не пократко од два месеца после
давање на втората доза.
Сите деца кај кои не е отпочната вакцинација до18 месеци од животот, се вакцинираат најдоцна до отпочнување на основното образование, со давање на три дози HB вакцина по шема 0, 1 и 6 месеци.
Децата кои не се потполно вакцинирани до 18 месеци од животот, ги примаат преостанатите дози на вакцина до отпочнување на основното образование.
- Имунизација против туберкулоза,
задолжителна активна имунизација против туберкулоза се врши со давање на една доза вакцина против туберкулоза (BCG вакцина) како примовакцинација.
На сите новородени деца во 2022 година, при отпуштање од родилиште. Децата кои не се родени во родилиште, се вакцинираат до навршени два
месеци од животот. Сите невакцинирани деца до крајот на првата година од животот, се вакцинираат до навршување на 14 годишна возраст.
Вакцинацијата кај децата до 12 месеци од животот се врши без претходно туберкулинско тестирање. Децата со навршена една година од животот до наполнети 14 години од животот, се вакцинираат после извршено туберкулинско тестирање, и тоа само оние со негативна туберкулинска реакција.
Ревакцинација против туберкулоза не се врши.
-Имунизација против Хемофилус инфлуенца тип Б
Имунизација против заболувања предизвикани од хемофилус инфлуенца тип Б се врши со давање на три дози на вакцина против заболувања предизвикани од Хемофилус инфлуенца тип Б (Hib вакцина) како примовакцинација и една доза Hib вакцина како ревакцинација, во вид на поединечна вакцина или во состав на поливалентна вакцина.
На сите деца родени од 01.11.2021 до 31.10.2022, до навршени 6 месеци од животот, со давање на три дози Hib вакцина на растојание од 1 до 3 месеци. Децата кај кои примоимунизација била започната подоцна, со навршени од шест до 12 месеци, Hib вакцинацијата се спроведува со давање на три дози Hib вакцина во состав на поливалентни вакцини, согласно одлука на Министерството за здравство бр. 22-4601/1 од 16.05.2016 година, а врз основа на заклучоците од Комитетот за имунизација.
Децата кај кои примоимунизација се започнува по навршени 12 месеци, се врши со поливалентни вакцини во чиј состав е и Hib вакцината и се спроведува со давање две или три дози, зависно од претходниот вакцинален статус, согласно одлука на Министерството за здравство бр. 22-4601/1 од 16.05.2016 година, а врз основа на заклучоците од Комитетот за имунизација.
Ревакцинација се врши на сите деца кои се примовакцинирани до 12 месеци возраст со една доза Hib вакцина која се дава шест месеци од последната примена доза, препорачливо до навршени 18 месеци.
Доколку примовакцинацијата не се заврши до препорачаните 12 месеци возраст, и ревакцинацијата не може да се спроведе до препорачаните навршени 18 месеци возраст, ревакцинација може да се спроведе подоцна.Согласно одлука на Министерството за здравство бр. 22-4601/1 од 16.05.2016, а врз основа на заклучоците од Комитетот за имунизација.
- Имунизација против дифтерија, тетанус и голема кашлица
Задолжителна активна имунизација против дифтерија, тетанус и голема кашлица се врши со давање на:
Tри дози комбинирана вакцина против дифтерија, тетанус и голема кашлица целуларна или ацелуларна (DTwP или DTаP вакцина), како поединечна или во состав на поливалентна вакцина, како примовакцинација.
Eдна доза на DTwP или DTаP вакцина, како поединечна или во состав на поливалентна вакцина, како I ревакцинација.
Две дози комбинирана вакцина против дифтерија и тетанус (DT или dT вакцина за возрасни (про адултис), како II и III ревакцинација.
Eдна доза вакцина против тетанус (ТT) или вакцина против дифтерија и тетанус про адултис (dT вакцина), како IV ревакцинација.
Вакцинација против дифтерија, тетанус и голема кашлица се врши:
На сите деца родени од 01.11.2021 до 31.10.2022, на возраст определена со Календарот за имунизација во 2022 година.
На сите деца најдоцна до навршени пет години од животот, кои до таа возраст не биле уредно вакцинирани, а не прележале голема кашлица.
Вакцинација против дифтерија, тетанус и голема кашлица се спроведува и кај деца од навршени пет до навршени 14 години од животот, ако дотогаш не биле вакцинирани или ако нема докази дека се вакцинирани против овие болести, со давање на три дози комбинирана вакцина (DTaP/IPV или dT/IPV вакцина), на растојание утврдено согласно Правилникот.
Ревакцинација против дифтерија, тетанус и голема кашлица се врши:
На сите деца комплетно вакцинирани против дифтерија, тетанус и голема кашлица во 2021 година, на возраст определена со Календарот за имунизација во 2022 година.
Првата ревакцинација против дифтерија, тетанус и голема кашлица се спроведува со давање на една доза на DTwP или DTaP вакцина како пoединечна или во состав на поливалентни вакцини кога ќе помине една година од потполната вакцинација.
- Вакцинација против дифтерија и тетанус се врши:
На сите деца до навршени пет години од животот кои не се вакцинирани, а ја прележале големата кашлица.
На сите деца родени од 2008 година наваму, ако не биле уредно вакцинирани против дифтерија и тетанус, на растојание утврдено согласно Правилникот.
Ревакцинација против дифтерија и тетанус:
На сите деца на седум годишна возраст, односно во II (второ) одделение на основното училиште, кои претходно се уредно вакцинирани и ревакцинирани против дифтерија и тетанус, според Календарот за имунизација.
Ревакцинацијата се спроведува со давање на една доза DTaP (во состав на четиривалентна DTaP-IPV) или против дифтерија и тетанус со давање на една доза DT за деца со неполни седум години или dT (вакцина за возрасни) за деца со наполнети седум години. Согласно одлука на Министерството за здравство бр.09-6044/1 од 20.08.2019.
На сите деца на 14-годишна возраст, односно во завршното одделение на основното училиште кои претходно се уредно вакцинирани ревакцинирани против дифтерија и тетанус, според Календарот за имунизација.
Ревакцинацијата се спроведува со давање на една доза dT (вакцина за возрасни) или Td ( во состав на тривалентна Td-IPV вакцинa). Согласно одлука на Министерството за здравство бр.09-6044/1 од 20.08.2019.
На сите деца до 14-годишна возраст, вакцинирани против дифтерија и тетанус прв пат во 2021 година, ако од вакцинацијата поминала една година.
- Вакцинација против тетанус се врши:
На сите лица од навршена 14-годишна возраст до навршена 18-годишна возраст, ако дотогаш не биле вакцинирани против тетанус или ако нема докази за вакцинирање, со давање на три дози вакцина против тетанус – тетанусен токсоид (ТТ вакцина), на растојание утврдено со Правилникот.
Ревакцинација се врши: евакцинација против тетанус се врши:
На сите лица на 18-годишна возраст, односно во завршната година на средното образование, ако дотогаш биле уредно вакцинирани и ревакцинирани против тетанус, согласно Календарот за имунизација.
На сите лица од 14-годишна возраст до 18-годишна возраст, кои во 2021 година прв пат биле вакцинирани против тетанус, ако од вакцинирањето поминала една година.
- Имунизација против детска парализа
Задолжителна активна имунизација против детска парализа се врши со давање:
Три дози вакцина против детска парализа со жива двотипна орална полио вакцина (во понатамошниот текст: OPV2) или мртва тритипна инактивирана полио вакцина (IPV) како поединечна или во состав на поливалентни вакцини како примовакцинација.
Една доза на OPV2 или IPV како поединечна или во состав на поливалентна вакцина, како I (прва) ревакцинација.
Една доза на OPV2 или IPV како II (втора) и III (трета) ревакцинација, како поединечна или во состав на поливалентна вакцина.
Вакцинација се врши:
На сите деца родени од 01.11.2021 до 31.10.2022, на возраст определена со Календарот за имунизација.
На сите сите деца родени 2008 година наваму до 31.10.2021 година, кои порано не биле вакцинирани против детска парализа.
Ревакцинација се врши:
На сите деца комплетно вакцинирани против детска парализа во 2021 година, ако од потполната вакцинација поминала една година.
На сите деца на седум годишна возраст, односно во II (второ) одделение од основното образование, кои претходно биле вакцинирани и ревакцинирани според Календарот за имунизација.
На сите деца на 14-годишна возраст, односно во завршното одделение на основното училиште, кои претходно биле вакцинирани и ревакцинирани според Календарот за имунизација.
- Имунизација против мали сипаници, заушки и црвенка - рубеола
Задолжителна активна имунизација против мали сипаници, заушки и црвенка -рубеола се врши со давање на една доза вакцина комбинирана жива вакцина против мали сипаници, заушки и црвенка – рубеола (МРП вакцина), како и една доза МРП вакцина со цел ревакцинација.
Вакцинација се врши:
На сите деца со навршени 12 месеци од животот, најдоцна до навршени 15 месеци.
На сите деца после навршување на 15 месеци до 14-годишна возраст, кои претходно не биле вакцинирани со МРП вакцина.
Ревакцинација се врши:
На сите деца на шест годишна возраст, односно во I (прво) одделение од основното образование, на почетокот на учебната година, а најдоцна до крајот на месец октомври со МРП вакцина.
На сите деца после шесттата година од животот до навршување на 14-годишна возраст, ако дотогаш не биле ревакцинирани со МРП вакцина.
Децата кои од било кои причини не биле вакцинирани согласно Календарот, ќе примаат две дози МРП вакцина на растојание од најмалку 30 дена, најдоцна до 14 годишна возраст.
- Имунизација против инфекции од Хуман папилома вируси - ХПВ
Задолжителната активна имунизација против инфекции причинети од Хуман папилома вируси (ХПВ) се врши со давање на две или три дози на вакцина против хуман папилома вируси (ХПВ вакцина).
Вакцинација се врши:
На сите женски деца на 12 годишна возраст, односно на сите девојчиња во седмо одделение од основното образование, со давањe на две или три дози вакцина, на растојанија согласно Календарот за имунизација.
На сите женски деца најдоцна до 14 годишна возраст, а кои претходно не биле вакцинирани со оваа вакцина, со давање на две или три дози вакцина, на растојанија согласно Правилникот.
- Имунизација против инфекции предизвикани од ротавируси
Имунизација против инфекции предизвикани од ротавируси се спроведува со три дози на жива орална петтовалентна ротавирусна вакцина (RV5), кај деца со навршени 60 дена од животот до навршени 32 недели од животот.
Вакцинација се врши:
На сите деца родени од 01.11.2021 до 31.10.2022, на возраст определена со Календарот за имунизација во 2022 година. Со давање на три дози ротавирусна вакцина на растојание од 4-10 недели. Третата доза треба да се даде најдоцна до навршени 32 недели од животот. Задолжителна вакцинација против инфекции предизвикани од ротавируси се врши согласно Одлука на Министерството за здравство бр. 09-4194/1 од 03.06.2019 година.
- Имунизација против инфекции предизвикани од Streptococcus pneumoniae
Имунизација против инфекции предизвикани од Streptococcus pneumoniae се спроведува со давање на конјугирана пневмококна вакцина на деца со навршени 60 дена од животот (два месеци), најдоцна до пет години.
Вакцинација на децата родени од 01.11.2021 до 31.10.2022, се спроведува со две дози вакцина и една доза ревакцина (бустер доза).
Растојанието помеѓу првата и втората доза вакцина треба да изнесува од еден до два месеци.
Ревакцинација се спроведува со давање на една (бустер) доза на возраст од 12-18 месеци
Вакцинација на децата кои навршуваат возраст од 12 до 23 месеци во текот на 2022 година, се спроведува со давање на две дози вакцина на растојание не пократко од два месеци.
Вакцинација на децата кои навршуваат возраст од две до пет години во текот на 2022 година, се спроведува со давање на една доза вакцина.
Задолжителна вакцинација против инфекции предизвикани од ротавируси се врши согласно Одлука на Министерството за здравство бр. 09-4193/1 од 03.06.2019 година.