Деновиве претседателот Иванов ќе го достави до Собранието предлогот за нов гувернер на Народната банка. Кандидатот за наследник на гувернерот Гошев, чиј седумгодишен мандат истекува во мај, Иванов ќе го предложи по интензивни консултации со бизнис и академската заедницата.
Последниве денови сум во интензивни консултации со коморите, наставниот кадар и професорите и во согласност со рокот, деновиве ќе го предложам кандидатот за гувернер до Собранието - изјави Иванов.
Претседателот не откри кои имиња се во игра за идниот прв човек на монетарната политика на земјата. Во јавноста се шпекулираше со вицегувернерот Димитар Богов, но и со министерот за економија Фатмир Бесими и вицепремиерот и министер за финансии Зоран Ставрески.
Изминативе години монетарната политика на Народната банка и фискалната на Владата честопати доаѓа во судир.
Додека власта бараше полабави услови за кредитирање на стопанството, НБРМ спроведуваше рестриктивна политика за зачувување на стабилноста на денарот. Двата пристапи имаа и поддржувачи и противници во бизнис заедницата.
Дали ќе има промени во монетарната стратегија со доаѓање на новиот гувернер останува да се види напролет.
