Светското население во 2011 година ќе достигне седум милијарди. Ова се наведува во извештајот на американската агенција за население, според која растот ќе дојде пред се од државите во развој, каде сега живее 90 насто од младите во светот, односно вкупно 1,2 милијарди.
Азија, Африка, Латинска Америка и Карибите ќе придонесат со 40 насто од вкупниот раст на населението, се наведува во извештајот, додавајќи дека младите луѓе од сиромашните држави и натаму ќе се селат во градовите, каде имаат повеќе можности за подобар живот.
Највисока стапка на наталитет и натаму ќе имаат сиромашните земји. Во Африка една жена раѓа 6-7 деца. Во развиениот свет најголем удел во растот на населението ќе имаат САД и Канада, но половина од него ќе се должи на имиграцијата. Во САД една жена раѓа во просек две деца, а во Канада 1,5.
Извештајот ги споредува сиромашната Уганда и развиената Канада, кои сега имаат приближно исто население. Уганда има 34 милиони жители, а Канада 31. Според стапките на растеж Канада во 2050 ќе има 42 милиони луѓе, а Уганда дури 96 милиони.
Држава во најголем број жители до 2050 ќе стане Индија со 1,7 милијарди луѓе и ќе и го преземе долгогодишниот примат на Кина, која со активната политика на ограничување на раѓањата ќе го сведе своено население до средината на векот на 1,4 милијарди луѓе.
Трета според бројот на население во 2050 ќе биде САД, со 439 милиони луѓе.
http://www.a1.com.mk/vesti/default.aspx?VestID=112539