РЕАКЦИИ ПО РАСПРЕДЕЛБАТА ВО РЕСЕН
Социјалните станови ги зедоа богаташи
Жанета Здравковска
стар ``дневник`` сабота, 18 март 2006
Социјалните станови во Ресен, наместо кај сиромашните, завршија кај богатите семејства, обвинија 113 незадоволни ресенчани чии барања се одбиени на конкурсот за распределба на станбените објекти. Откако тие се заканија со улични протести, ресенскиот градоначалник Димитар Бузлевски побара од Владата да ја поништи одлуката за распределба на становите во Ресенската општина.
Од 142 пријавени семејства во Ресен на конкурсот за доделување на станови за лица со ниски приходи, кој беше распишан во септември, на крајот од минатата година Министерството за транспорт прифати само 29 барања.
Општинскиот комитет на ВМРО-ДПМНЕ во Ресен тврди дека во распределбата на становите вмешале прсти локалниот разгранок на СДСМ и градоначалникот Бузлевски, кој е член на оваа пратија.
- На 12 ресенчани што ќе добијат социјални станови не само што им е решено станбеното прашање туку материјално ги имаат обезбедено и своите внуци - вели локалниот лидер на ВМРО-ДПМНЕ, Ѓоко Стрезовски. Тој ги посочува Весна Арсова-Митревска, советник од редовите на СДСМ, Атли Шерифи, директор на Центарот за социјални грижи, кадар на ДУИ и други лица. Во ВМРО-ДПМНЕ истакнуваат дека дел од овие лица се пријавиле со лажни адреси.
- Освен што имаат станови во Ресен, поседуваат куќи низ преспанските села, а имаат и големи приходи од овоштарство - велат во партијата.
Градоначалникот Бузлевски ги отфрла обвинувањата, но признава дека становите ги добиле погрешни луѓе. Според него, некои од нив во документацијата што ја доставиле до Комисијата за доделување станови навеле дека немаат имот. Во Геодетската управа имотот се водел на име на нивните родители.
- Побарав поништување на конкурсот затоа што дел од лицата што добија станови имаат куќи со површина од 150 до 250 квадрати и остваруваат огромни приходи од овоштарство - рече Бузлевски.
Тој од Владата побара да се распише нов конкурс, а при новата распределба на становите мониторинг да вршат невладините организации од Ресен. Ни Владата ни заменик-министерот за транспорт, Дејан Кошутиќ, се уште не му одговориле на Бузлевски за овие барања.
Но Стрезовски од ВМРО-ДПМНЕ не се согласува со овој предлог на Бузлевски, бидејќи сите локални невладини организации биле под капа на градоначалникот.
- Ваквата вербално-дописна еквилибристика на Бузлевски со Владата е само уште една од неговите нечесни игри и има за цел до изборите да ги држи под контрола и во неизвесност сите лица што се одбиени - изјави Стрезовски.
Инцидент на Бузлевски и Гештаковски во кафеана поради политика?
извор
http://www.utrinski.com.mk/?ItemID=65B55D3C9B342D49ACF39ADE27286D32
Поранешните сопартијци од СДСМ се спречкале во селската кафеана во Јанкоец, Ресенско
Градоначалникот на Ресен, Димитар Бузлевски, и неговиот сограѓанин и поранешен сопартиец од редовите на СДСМ, Кире Гештаковски, се степале во кафеана. Во МВР потврдија дека по јавување на граѓанин, интервенирале во кафеаната во ресенското село Јанкоец, додека потврда од двајцата учесници во инцидентот нема.
"Најобични глупости. Нема никаква вистина во тоа. Ниту сум бил во конфликт со Гештаковски ниту, пак, имам потреба за тоа", ни изјави првиот човек на Ресен, Димитар Бузлевски. Кире Гештаковски не беше достапен на својот мобилен телефон.
Како што дознаваме од полициски извори, инцидентот се случил во 2 часот наутро на 25 ноември, кога во селската кафеана во Јанкоец влегол ресенскиот градоначалник Димитар Бузлевски. Тој на келнерите во локалот им најавил дека ќе се гостел со другарите. Келнерите во кафеаната, наводно, во полициската белешка изјавиле дека градоначалникот и неговото друштво во два наврата пиеле по три литри домашно вино, по што атмосферата на нивната маса била весела.
Но, проблемот настанал кога во кафеаната влегол Кире Гештаковски, поранешен сопартиец на Бузлевски, кој пред неколку месеци го напушти СДСМ и премина во новата Партија на слободни демократи, предводена од Љупчо Јордановски. Токму тоа, наводно, и била причина поради која за кратко време почнале препукувањата меѓу Гештаковски и неговите другари од едната маса и Бузлевски и пријателите кои седеле на другата маса. Откако не можеле да се докажат со зборови, наводно, меѓу нив, наводно, дошло до физичка пресметка.
Тепачката се преселила и надвор од кафеаната, а најдебелиот крај го извлекол човек кој се обидел да ги раздвои.
Еден од гостите што што биле во кафеаната, го пријавил случајот во полиција, по што конфликтот бил решен. Против учесниците во инцидентот не се поднесени пријави.
